Borgarafundur í Háskólabíó í kvöld kl 20:00

Hvet alla til að mæta, Ríkisstjórnin kemur vonandi, þeim hefur verið boðið. Skuldastaðan og týndu milljarðarnir verða m.a. til umræðu.

Geiri glópal og hauspokinn.

Skoðunarkönnun dagsins þar sem Sjálfstæðisflokkurinn sækir á er með ólíkindum. Það virðist fátt geta komið í veg fyrir að Sjálfstæðisflokkurinn leiði næstu ríkisstjórn. Er nokkuð hægt að fjasast út í það ef fólk vill hafa það þannig. Samt nokkuð merkilegt sökum þess að Sjálfstæðisflokkurinn ber fyrst og síðast ábyrgð á stjórn landsins síðastliðin 18 ár. Síðan getur maður ekki einu sinni flutt frá landinu sökum óseljanlegra eigna. Því er maður fangi Sjálfstæðisflokksins,"untill death do us apart" Þetta hljómar ekki vel.

Erlendis opnar enginn seðlaveskið fyrir okkur fyrr en Oddsson er kominn úr Seðlabankanum. Við erum álitin bananalýðveldi því enginn hefur sagt af sér og Haarde brosir á BBC og segist ekki vera neitt sorry. Meðan þetta hrjáir okkur þá snyrta þeir hjá sér neglurnar í efnahagsbrotadeildinni því það er ekkert hjá þeim að gera, Baugsmálið búið svo fátt er að fást við. Krónan er föst og einskis virði. Skuldasúpa Sjálfstæðisflokksins dugar okkur í 1-200 ár. Flest öll fyrirtæki landsins gjaldþrota. Atvinnuleysi eykst með hraða ljóssins. Þingmenn fara með gamanmál úr ræðustól alþingis og Sjálfstæðismenn gera allt sem í þeirra valdi er til að trufla störf minnihlutastjórnar Jóhönnu. Svo ætlar fólk að kjósa þá aftur. Er ég eitthvað bilaður, hef ég misskilið eitthvað. Af hverju er ég með aulahroll. Á ég bara ekki að sætta mig við þetta, ég hlýt að vera minnihlutahópur. Það er samt að þvælast fyrir mér hvers vegna mér finnst ég samt þurfa hauspoka ef ég fer erlendis.

Hvers vegna á að afnema verðtryggingu á Íslandi.

Heimilin á hrakhólum. Núna er borgarafundur hjá Akureyringum um vandamál heimilanna í kjölfar kreppunnar. Sökum þess að hitastig umhverfisins lækkaði hér fyrir sunnan og hríðarkófið hóf sinn dans varð manni hugsað norður fyrir heiðar. Aftur á móti tel ég fólki sé heitt í hamsi núna fyrir norðan. Verðtryggingin verður sjálfsagt aðalmálið. Hún verður sjálfsagt meðhöndluð með hefðbundnum skotgrafahernaði. Unga fólkið losnar við verðtrygginguna og setur gamla fólkið út á guð og gaddinn. Þvílík heimtufrekja og óskammfeilni af þessu ofdekraða liði. Bara svona í framhjáhlaupi ætla ég minna á það að þeir sem hafa verið að fara á eftirlaun á liðnum árum byggðu sín hús með lánum sem brunnu upp til agna í verðbólgunni á sínum tíma.

Ég tel að nauðsyn þess að afnema verðtrygginguna sé ekki fyrst og síðast budda húseigenda og lífeyrisþega. Mun mikilvægara er að afnema verðtrygginguna vegna þeirra skaðlegu áhrifa sem hún hefur á allar lánastofnanir landsins og stjórnendur þeirra. Þeir sem stunda lánastarfsemi á Íslandi þurfa aldrei að hafa áhyggjur af afkomu stofnana sinna. Þeir geta bara grætt en aldrei tapað, lántakandinn er einn um þá hlið mála. Mjög sérkennilegt og óeðlilegt fyrirkomulag. Þegar reynir aldrei á hæfni manna að reka lánastofnun þá er augljóst að vanhæfir einstaklingar geta setið þar tryggir í sínum stólum. Meðan ég bjó í Svíþjóð fékk ég húsnæðislán á föstum vöxtum til ákveðins tíma, 1 til 10 ára. Lánið sjálft var til 30 til 40 ára en nýir vextir með jöfnu árabili. Verðbólgan gat verið hærri og þá tapaði bankinn en ég græddi. Því þurftu sænskir bankamenn virkilega að gæta hófs og sýna mikla skynsemi við rekstur fyrirtækja sinna.

Því hefur íslenska verðtryggingin alið af sér óhæfar lánastofnanir á Íslandi. Stjórnendur hafa aldrei þurft að takast á við stjórnunarlega ábyrgð eins og starfsbræður þeirra í nágrannalöndunum. Ætli yfirbygging og flottheit hjá viðkomandi lánastofnunum væri eins ef þeir þyrftu að reka sín fyrirtæki eins og aðrir þegnar þessa lands. Þetta er svipað ef að læknir meðhöndlar sjúklinga sem geta ekki dáið hvaða vitleysu sem lækninum dettur  í hug. Þess vegna er nauðsynlegt að afnema þessa verðtryggingu. Þar fyrir utan er það algjör geggjun að verðlag á bílum sem ekki seljast á Íslandi í dag hækki lánin á húsinu mínu. Amen

 

 

 

"kannski ég hefði átt að gera það"

Þetta er Geir Haarde uppmálaður og öll stjórnkænska hans. Mikill skortur á framtakssemi. Sjálfsagt mun vera hægt að færa rök fyrir því að athafnaleysi hans hafi gert kreppuna á Íslandi verri. Að bregðast ekki við augljósri hættu eða neyð er refsivert athæfi. Við göngum bara ekki framhjá slysstað án þess að reyna að hjálpa. Síðan stjórnar þessi maður stjórnarandstöðu sem stundar málþóf og upphlaup sem tefur önnur mikilvæg störf á Alþingi. Verkstjóri í unglingavinnunni myndi sjálfsagt fórna höndum og óska þess að hann væri kominn einhvurt annað. Ég held að það ætti að setja þingmenn á uppmælingu eða akkorð svo hlutirnir komist í verk. Þeim er greinilega ekki treystandi á tímakaupi.

Birgir og upplýsingaveitan.

Birgir Ármannsson spyr Jóhönnu um tölvuskeyti frá Alþjóðagjadeyrissjóðnum. Þetta skeyti var sent í Forsætisráðuneytið sem trúnaðarmál. Í þessu sambandi skiptir engu hvort Jóhanna vissi um skeytið eða ekki. Stóra spurningin er aftur á móti hvernig Birgir vissi um trúnaðarskeyti. Aðspurður svarar hann" Ég heyrði þetta utan að mér í gær og vegna þess að ég var ekki viss þá ákvað ég að spyrja forsætisráðherra". Hvernig stendur á því að trúnaðarupplýsingar liggja svona á lausu um alla þingsali? Ef Birgi þyrstir svona mikið í sannleikann þá þætti okkur vænt um að vita hver er hans DEEP THROAT.

 

Landráð.

Var á mjög góðum fundi á Akureyri á sunnudaginn um landráð. Fyrir þá sem hafa misst af því tengjast þær vangaveltur hvort stjórnvöld eða aðrir Íslendingar séu landráðamenn sökum þess að landið er komið á hausinn. Bjartsýnismenn telja skuldir okkar eina til tvær vergar þjóðarframleiðslur. Hvers vegna menn eru svona hræddir við að nefna tölurnar beint er mér hulin ráðgáta en fæ þó slæman fíling. Mér sýnist af öllu að menn séu að tala um 1300 til 2600 milljarða. Segjum bara tvö þúsund milljarða. Nú svo bætast við vextir en gleymum þeim þangað til síðar. Ef okkur tekst að nurla 20 milljörðum árlega í afgang til að borga niður þessar skuldir þá mun það taka 100 ár að borga þessa skuld. Ef ég mun eignast barnabörn á næstu 10 árum munu þau sennilega vera látin þegar skuldin er að fullu greidd.

Þegar stóri meirihlutinn af þjóðinni velur lítinn minnihluta til að stýra þjóðarbúinu fyrir sig er talað um lýðræði og þingræði. Meirihlutinn afsalar sér sínum völdum til minnihlutans og þar með einnig ábyrgð. Þið munið þetta, völd- ábyrgða og ofurlaun. Litla minnihlutanum var falið að reka þjóðarbúið. Þá erum við að meina að menn áttu að standa í skilum. Borga skuldir, ávaxta pundið og forðast skuldsetningu. Niðurstaðan er sú að skuldastaðan er svo slæm að skuldunautar okkar hafa örlög okkar í hendi sér.Við erum á hnjánum. Við eigum engra kosta völ. Sjálfstæði okkar er minna virði en þræls. Þessi minnihluti sem fór þannig með traust okkar er því landráðamenn, hvað annað?

BORGARFUNDUR Á AKUREYRI Í GÆR.

Borgarafundurinn í gær í Ketilhúsinu á Akureyri var mjög góður. Húsið er skemmtileg umgjörð um slíka fundi og virkaði mjög vel á mig. Frummælendur voru góðir og skelegir. Mikið spurt svo að fundurinn varð töluvert lengri en ráð var fyrir gert. Það kom ekki að sök því spurningarnar voru góðar.

 

 

 

 

 

 

 

 

 

 

 

 

Hér sést yfir fundasalinn, það var vel mætt og nánast húsfyllir. Finnst það mjög gott á miðjum sunnudegi samtímis og skíðafærið í fjallinu gæti ekki verið betra.

 

 

 

 

 

 

 

 

 

 

 

 

Sigurjón mágur er óþreytandi að segja fólki frá ranglátu kvótakerfi og þeirri spillingu sem það hefur skapað. 

 

 

 

 

 

 

 

 

 

 

 

 

Þarna er panellinn. Sennilega átti Vilhjálmur Bjarna skúbb fundarins þar sem hann upplýsti að afskifti hans gætu komið í veg fyrir að háskóladeild sú sem hann starfar fyrir fengi frekari styrk frá ákveðnum fyrirtækjum.-Kúgun??

Það kom fram á fundinum að það gæti verið örðugt að dæma menn fyrir landráð. Ég sé ekki að það ætti að vera svo slæmt því það er augljóst að hægt er að fá menn dæmda fyrir þjófnað, svindl og óheiðarleika.

Lokaorð fundarins átti hin stórglæsilega þingkona og fyrrum bankamálaráðherra Valgerður. Þegar Andrés Magnússon geðlæknir spurði Valgerði hvort það hefði aldrei komið fram í stjórnsýslu ráðuneytanna að Ísland væri búið að vera eitt skuldugasta ríkið í heiminum í áraraðir og að skuldirnar jukust allt góðærið, þá svaraði Valgerður, "þið skiljið ekki hvernig Ríkisstjórnir starfa" Nú við þessi venjulegu gátu ekki annað en tekið heilshugar undir þessi orð. Við nefnilega skiljum alls ekki hvað þessu fólki hefur gengið til undanfarin ár. Geðlæknirinn hefur örugglega dýpri skilning á þessari mannlegu hegðun og sjálfsagt koma honum til skila við annað tækifæri.

BORGARAFUNDUR Á AKUREYRI Í KETILHÚSINU KL 15:00-Landráð af "gáleysi".

Nú er maður kominn á Krókinn til Sigurjóns mágs. Borgarar úr höfuðstaðnum eru á leið til höfuðstaðar norðurlands, Akureyri. Tilefnið er Borgarafundur á Akureyri. Hann mun vera haldinn í Ketilhúsinu á Akureyri. Kl 15:00. Efni fundarins er Landráð af "gáleysi". Góðir ræðumenn eru á boðstólnum. Sigurjón mágur mun ræða um kvótann og spillinguna. Margrét Heinriksdóttir mun ræða um lög tengd landráði. Andrés Magnússon geðlæknir ræðir um möguleikana að ná fjármunum landráðamannanna til baka. Vilhjálmur Bjarnason viðskiptafræðingur ætlar að hella úr skálum reiði sinnar, eða að ég vona það að minnsta kosti. Síðan verður almenn umræða. Vonandi munu norðanmenn taka vel við sér og gera fundinn líflegan og skemmtilegan.

Landráð af gáleysi. Hvað er það í raun og veru. Landráð er sjálfsagt eitthvað flókið fyrirbæri lagalega séð. Fyrir okkur hinum dauðlegum þá snýst það um að afhenda fjöregg þeirrar þjóðar sem þú tilheyrir til einhverra annarra. Ef til vill verður einhverjum slíkum spurningum svarað á morgun á borgararfundi á Akureyri.

Jón Magnússon og Frjálslyndi Flokkurinn.

Jón Magnússon mun ekki bjóða sig fram fyrir Frjálslynda flokkinn aftur. Þetta segir hann í DV og einnig í öðrum miðlum. Undanfarna mánuði hafa margir flokksmenn í FF verið að hópast í björgunarbátana. Langlundargeð Jóns vekur í raun eftirtekt því flest allir sem störfuðu í kjördæmi hans, Reykjavík, eru hættir í flokknum eða hættir að taka þátt í starfi hans. Það var blandaður hópur af fólki sem kom til starfa fyrir flokkinn hér í Reykjavík eftir síðustu kosningar. Stefnuskrá flokksins er góð og þessi hópur vildi vinna mikið starf með þingmanni sínum í Reykjavík. Grunnhugmyndin var sú að þar sem flestir kjósendur væru í Reykjavík væri mjög mikilvægt að efla flokkinn í Reykjavík. Með öflugu starfi í Reykjavík væri hægt að stækka flokkinn verulega. Því miður þá tókst yfirstjórn flokksins aldrei að tileinka sér þessa stefnu. Við sem störfuðum í Reykjavík komumst ekkert innan flokksins, tilvist okkar virtist vera ógn við ráðandi öfl í flokknum. Eftir þessa lífsreynslu þá er niðurstaða mín sú að kjarnamarkmið flokksins sé að eiga að minnsta kosti einn þingmann frá Ísafirði og þá sé markmiðinu náð.

Í raun er þessi niðurstaða mjög sorgleg. Stefna Frjálslynda flokksins er góð að mörgu leyti. Reyndar svo góð að meginstef hennar hafa verið meginkröfur mótmælenda um allan bæ eftir að kreppan hófst. Því er það með hreinum ólíkindum að stjórnmálaflokkur sem virðist eiga mikinn og góðan samhljóm meðal allra mótmælenda vetrarins minnki fylgi sitt í skoðunarkönnun eftir skoðunarkönnun. Í dag mælist flokkurinn í kringum 2% í könnunum. Flestum ætti að vera ljóst að eitthvað mikið er að þegar flokkur við slíkar aðstæður minnkar og meginstarf formannsins alla sína starfstíð hefur verið að stilla til friðar innan flokksins. Sem grasrót get ég ekki tekið ábyrgð á slíku. Hversu seint Jón Magnússon yfirgefur hið sökkvandi skip ber merki þess að hann sé séntilmaður, því konur og börn fara alltaf fyrst í björgunarbátana.

Erum við gjaldþrota eða ekki??

Uppgjör banka og fyrirtækja koma fram þessa dagana. Eignir eru yfirleitt lítill hluti af skuldum, það virðist vera meginreglan. Skuldir Íslendinga samkvæmt heimasíðu Seðlabankans eru ríflega 11 þúsund milljarðar. Samkvæmt fyrrnefndri reglu verða eignirnar eingöngu lítill hluti af öllum skuldunum. Einnig er vert að hafa í huga að megnið að skuldum okkar eru í erlendri mynt. Eignir bankanna okkar eru að miklu leiti veð í fasteignum á Íslandi. Jafnvel þó bankinn fái gott verð fyrir húsið mitt þá hjálpar það honum mjög lítið því hann fær það greitt í íslenskum krónum sem duga ekki til greiðslu á erlendu lánunum. Það var haft á orði um daginn að ill mögulegt væri fyrir íslenska þjóð að greiða 3 til 4 þúsund milljarða skuld. Af því leiðir að lífsins ómögulegt er fyrir okkur að greiða niður 11 þúsund milljarða. Því miður er sú tala fenginn í byrjun desember og með fallandi krónur hækkar sú tala stöðugt. Ef þetta er rétt hjá mér, þá er Ísland gjaldþrota. Hvernig væri að einhver ábyrgur aðili innan stjórnsýslunnar tæki af skarið og segði okkur hvað er rétt í þessu?