Bæjarins bestu og Alþjóðagjaldeyrissjóðurinn

Grein eftir mig á Svipunni 26 ágúst 2010.

                                        Bæjarins bestu og Alþjóðagjaldeyrissjóðurinn

All nokkrir einstaklingar vilja Alþjóðagjaldeyrissjóðinn úr landi sem fyrst. Þeir sem eru því ósammála bera því við að AGS sé eini valmöguleiki Íslands í dag. Svar þeirra við ósk okkar um brottflutning sjóðsins frá Íslandi er oftast á þá leið hvað við viljum þá gera í staðinn. Ástæðan fyrir því að við viljum sjóðinn burt er ekki sú að við vitum nákvæmlega hvernig eigi að leysa vanda Íslands heldur að við teljum sjóðinn stórhættulegan. Þar greinir okkur einnig á við viðmælendur okkar því þeir telja sjóðinn til bóta í íslensku þjóðlífi. Mín reynsla er oftast sú að þeir sem treysta sjóðnum hafa ekki kynnt sér sögu hans að neinu viti. Það virðist vera beint samband á milli þekkingar á Alþjóðagjaldeyrissjóðnum og viljans til að losna við hann.

Til að svara þeirri gagnrýni að andstæðingar sjóðsins viti ekki hvernig eigi að kippa landi og þjóð út úr mesta efnahagshruni Íslandssögunnar þá vil ég nefna nokkur atriði. Nokkrir þingmenn hafa lagt fram þingsályktunartillögu um að finna leið út úr vandanum án aðkomu AGS. Þessi hugmynd fæst ekki rædd á Alþingi, það fæst ekki fjármunir til að kalla til sérfræðinga, bæði innlenda eða erlenda, til að koma upp með „Plan B“ eins og við köllum það. Þeir þingmenn eða fræðingar í þjóðfélaginu sem tjá sig um planB komast oftast ekki að í ríkisfjölmiðlunum. Að minnsta kosti hafa þeir sem hlusta eingöngu á fréttamiðla hliðholla ríkisstjórninni litla hugmynd um andstæðinga sjóðsins, hugmyndir þeirra um aðrar lausnir eða hvort við eigum yfir höfuð að óttast sjóðinn. Sjóðssinnar vita að þeim mun minni þekking á sjóðnum og fortíð hans skapar gagnrýnislaust andrúmsloft í þjóðfélaginu. Slík tenging er mjög augljós í vandræðum Þjóðkirkjunnar þessa dagana vegna fortíðar hennar.

Andstæðingar sjóðsins segja í dag að hans sé ekki þörf lengur. Hugmyndir um að nota skatttekjur af séreignasparnaði til að leysa yfirvofandi halla ríkissjóðs á næsta ári eru skynsamar því þær hamla gegn niðurskurði og auknum almennum skattahækkunum. Báðar aðgerðirnar-þ.e. skurður og skattar- eru kreppudýpkandi í eðli sínu. Það hefur verið margsinnis bent á að AGS hefur með ráðstöfunum sínum aukið vandræði þeirra þjóða sem hann sinnir einmitt vegna þess að hann gengur allt of langt í niðurskurði og sköttum.

Alþjóðagjaldeyrissjóðnum hefur verið veitt völd á Íslandi sem eru einstök. Davíð Oddson hafði aldrei jafn mikil völd á sínum tíma. Alþjóðagjaldeyrissjóðurinn er sá aðili á Íslandi sem aftekur með öllu að skuldsettum heimilum sé rétt hjálparhönd. Þess vegna mun óviss fjöldi heimila venjulegs fólks fara á uppboð í vetur. Viðkomandi einstaklingar munu missa heimili sín sem oft á tíðum er ævisparnaður þeirra og fé sem hugsað var til elliáranna. Fjölskyldur munu því þurfa að flytja af heimilum sínum og leigja sér húsnæði. Sú skuld sem út af stendur mun síðan fylgja fjölskyldum inn í þeirra nýju heimkynni hvar sem til þeirra næst þangað til að skuldin er að fullu greidd.

Að sjóðnum gengnum fengi Ísland aftur fullveldi sitt óskorað. Þá væri möguleiki að taka á skuldavanda einstaklinga og fyrirtækja þannig að sem mest sátt skapaðist um aðgerðir. Þá væri haft að leiðarljósi að skuldabyrðin gerði meðbræðrum okkar kleift að halda áfram að skapa verðmæti eða auka á snúning þjóðfélagsins með neyslu. Einhvern rétt hljóta einstaklingar í þjóðfélagi okkar að eiga sem hafa með dug og ósérhlífni tekið þátt í því með okkur hinum að skapa þá auðlegð sem þetta land býr yfir. Stefnan í dag er aftur á móti sú að innheimta sem mest af skuldunum, bönkum til framdráttar, síðan er bara skítt og lagó með hina.

Alþjóðagjaldeyrissjóðurinn mun setja það sem skilyrði í næsta mánuði þegar þriðja endurskoðun sjóðsins fer fram að Ísland greiði Icesave skuldina. Þar er um að ræða gallað regluverk Evrópusambandsins, gallinn er í því fólginn að ekki er nægjanlega tryggt í lögum að almenningur eigi að borga fyrir mistök bankanna. Þess vegna þarf AGS að troða mistökum bankanna ofan í kokið á íslensku þjóðinni. Ef það gengur eftir að við sitjum uppi með Icesave reikninginn, til viðbótar við allar aðrar skuldir, er nokkuð víst að við getum kvatt Norræna velferðaþjóðfélagið okkar fyrir fullt og fast.

Okkur, andstæðingum sjóðsins, finnst ráðstafanir hans kreppudýpkandi, sjónarmið hans er hagur banka fyrst og síðast og almenningur er látinn borga fyrir mistök bankanna. Sjóðurinn hefur fengið völd á Íslandi sem eru meiri en Alþingi og framkvæmdavald hafa til samans, því er um valdarán að ræða og fullveldi landsins er ekki lengur á forræði okkar. Okkur finnst þessi atriði duga vel til að skapa mikla umræðu og ætti að gegnsýra alla pólitíska umræðu á Íslandi í dag. Sú umræða gæti verið erfið en fjarvera hennar er mun verri.

Það er að brjótast um í mér hvers vegna elítunni á Íslandi finnst sjóðurinn hafinn yfir alla gagnrýni og sporðrennir honum eins og bæjarins bestu.

Vanhæfni eftir pöntun-Sveinn Margeirsson

Vanhæfni virðist vera stjórnsýsluverkfærið þessa dagana. Samskipti milli Seðlabanka og viðskiptaráðuneytisins virðast vera í ólagi. Samskipti milli Seðlabanka og forsætisráðuneytisins virðast hafa verið í ólagi. Samskipti milli ráðuneytismanna í viðskiptaráðuneytinu og ráðherra virðast vera í ólagi. Eina sem vitað er með vissu að aðstoðarseðlabankastjóri lét gera álit sem enginn las. Að minnsta kosti skilur Jóhanna ekkert í því hvers vegna enginn setti henni fyrir að lesa heima. Almenningur telur að hér sé um verulega vanhæfni stjórnsýslunnar að ræða. Þrátt fyrir það er enginn settur af.

Sveinn Margeirsson sem tilnefndur var í rannsóknarnefnd um Magma málið var settur af. Hann var talinn vanhæfur sökum þess að hann á frænku sem er í annarri nefnd á vegum hins opinbera. Auk þess mun hann hafa talað við þessa frænku sína. Jóhanna hafði snör handtök og snaraði honum úr nefndinni. Núna hefur hún lagt til atlögu við Bjarnveigu Eiríksdóttur sem er tilnefnd í nefndina og á sennilega frænda einhversstaðar.

Framkvæmdavaldið er ósnertanlegt á Íslandi. Við höfum engin tök á því að setja af vanhæfa einstaklinga af innan þess, nema að bíða eftir því að þeir komist á eftirlaun. Aftur á móti er framkvæmdavaldinu í lófa lagið að ráðskast með einstaklinga og nefndir sem eru þeim ekki þóknanleg. Sveinn er mjög kunnugur því málefni sem hann á að meta í fyrrnefndri nefnd. Sveinn er mjög fylginn sér og auk þess mjög réttsýnn maður. Því virðist vanhæfni Sveins felast í of mikilli hæfni til að fjalla um málið.

Sveinn ógnar þeirri niðurstöðu sem auðhringir höfðu lagt á ráðin með. Jóhanna og vinstri stjórn hennar vinnur með þeim að ryðja öllum hindrunum úr vegi svo að auðlindir okkar komist í eigu erlendra aðila.

 

 

 

 

 

 

Ráðstafanir Steingríms eru kokkaðar í Whasington

Pressugrein  3 ágúst 2010.

Bankahrunið eins og nafnið gefur til kynna er orsakað af bönkum og starfsemi þeirra. Hvert og eitt okkar hinna gekk til sinna starfa árið 2008, sinntum skyldum og skuldbindingum okkar að venju. Sú fullyrðing að við séum meðsek vegna þess að við horfðum ekki yfir axlirnar á bönkunum, ríkisvaldinu og eftirlitsstofnunum á hverjum degi er æði langsótt.

Síðan hafa allar aðgerðir stjórnvalda snúist um að skrapa saman eins miklum fjármunum og nokkur kostur er til að greiða skuldir bankakerfisins. Það sem þessar skuldir eiga sameiginlegt er að Alþingi Íslendinga hafði ekki stofnað til þeirra fyrir hrun. Upphaf skuldanna má rekja til athafna utan valdsviðs kjörinna fulltrúa þjóðarinnar. Þrátt fyrir það á þjóðin að borga skuldirnar á eftirfarandi hátt:

Boðuð er frysting á launum í all nokkur ár og segir ráðherra vel sloppið ef frystingin ein dugar. Niðurskurðahugmyndir fyrir komandi fjárlagaár eru svo hrikalegar að framkvæmdastjórar ýmissa stofnana telja sig ekki geta veitt lögbundna þjónustu.

Háir stýrivextir á Íslandi eru banvænir fyrir viðkvæmt atvinnulíf okkar. Hækkun skatta.

Niðurskurður hjá hinu opinbera veldur atvinnuleysi, bæði hjá opinberum starfsmönnum og einkaaðilum sem höfðu verkefni hjá hinu opinbera. Niðurskurður tekna almennings veldur samdrætti hjá öllum fyrirtækjum landsins og þar með er kominn vítahringur.

Nánast engar afskriftir verða leyfðar hjá skuldugum einstaklingum og sennilega mun verða gengið milli bols og höfuðs á 25 þúsund heimilum fyrir áramót. Mörg fyrirtæki hafa farið í gegnum sömu aftökur síðan hrunið varð. Sökum síversnandi aðstæðna mun fjölga stöðugt í þessum hópi eftir því sem tíminn líður.

Reynt er að draga fé úr lífeyrissjóðum okkar til að ná af okkur sparnaðinum. Fjárfest er í flugfélagi sem er mikill áhætturekstur en ekki fékkst leyfi til að fjárfesta í HS-Orku sem á framtíðina fyrir sér.

Hugsanlegt er að vegaframkvæmdir fari af stað sem einkaframkvæmd og þá greidd upp með vegatollum.

HS-orka var seld til erlends einkafyrirtækis í óþökk Íslendinga. Litlu munaði að búið væri að einkavæða vatnið okkar og stór spurning er hvernig löggjöfin um vatnið verður næsta vetur.

Samantekið: Laun skorin niður, skattar hækkaðir, gjöld aukin, lífeyrissparnaðurinn kroppaður af okkur. Allt gert til að auka getu ríkissjóðs og almennings til að greiða lánadrottnum. Hingað til höfum við talið það vera hlutverk ríkissjóðs að jafna kjör almennings í landinu og standa í framkvæmdum landi og þjóð til hagsbóta.

Þessi stefna mun leiða til aukins fjölda fátækra og samsvarandi minnkunnar á millistétt. Fámennur hópur stórríkra einstaklinga verður áfram til. Auðlindirnar komnar í eigu einkaaðila. Einkavæðing á almanna þjónustu. Þeir sem hafa fjárráð munu fá góða þjónustu. Spillingin heldur meiri ef eitthvað er. Landflótti og þeir sem eftir eru að leita sér matar í öskutunnum besta bæjarins, Reykjavíkur.

Mörgum finnst sjálfsag myndin máluð dökkum litum. Viðkomandi stefna hefur haft slíkar afleiðingar í för með sér í öðrum löndum og enn sem komið er hefur lítil mótstaða við þessari þróun myndast á Íslandi. Kjósendur núverandi ríkisstjórnar sem eru vinstri menn og félagshyggjufólk hafa sjálfsagt ekki gert ráð fyrir þessu. Mjög skiljanlegt því viðkomandi stefna er ekki skráð í stefnuskrár viðkomandi ríkisstjórnarflokka. Stefnan er stefna Alþjóðagjaldeyrissjóðsins.

Sumir leiðtogar vinstri manna hafa fylgt stefnu AGS í löndum sínum og oftar en ekki tekist að halda andófi í lágmarki. Sagt er að óskastjórn AGS sé vinstri stjórn því þá eru mótmæli í lágmarki. Það er sorgleg staðreynd að andstæðingum AGS væri þægð í því að hægri menn kæmust til valda á Íslandi á ný. Þá myndu vinstri menn koma aftur á Austurvöll og mótmæla eins og þeir gerðu í búsáhaldabyltingunni. Mikil og kröftug mótmæli almennings gegn AGS er eina leiðin til að snúa af þeirri braut sem þjóðin er á.

Það er mjög skiljanlegt að loksins þegar Vinstri grænir eru komnir til valda að þeir vilji halda völdunum og að sleikipinnarnir innan flokksins reyni allt til að skríða upp eftir bakinu á flokkseigendafélaginu. Það eru mikil vonbrigði, eftir að hafa upplifað alla þessu hörðu andstæðinga Alþjóðagjaldeyrissjóðsins í búsáhaldarbyltingunni, njóta í dag valdanna af slíkri áfergju að öll prinsipp eru gleymd og grafin. Það er mér hulin ráðgáta að stefna strákanna frá Whasington sé orðin að vinstri stefnu á Íslandi og er varin sem slík.

Fjölmiðlar mættu standa sig betur í því að skýra út fyrir almenningi að Steingrímur er bara millistjórnandi og að það er AGS sem ræður öllu á Íslandi. Ef það hefði verið gert hefði almenningur beint reiði sinni að AGS frekar en Steingrími. Vissum aðilum(fjölmiðlum) hentar að spjótin standi á Steingrími og aðrir aðilar(fjölmiðlar) verja hann með kjafti og klóm. Á meðan hlær AGS að heimsku okkar.

Eftir því sem stjórnvöld þjóðríkja fylgja ráðleggingum AGS betur farnast almenningi viðkomandi landa ver, rannsóknir fræðimanna sýna fram á þetta.

Það er augljóst að enn sem komið er hafa helstu máttastólpar lýðræðisins á Íslandi þ.e.  Alþingi, ráðherrar og fjölmiðlar, kosið að fylgja AGS að málum. Ef fyrrnefndir aðilar skipta ekki fljótlega um skoðun mun stór hluti íslensku þjóðarinnar fylgjast með gleði þeirra á störfum sjóðsins úr fjarlægð, erlendis frá. Aftur á móti, ef Alþingi, ráðherrar og fjölmiðlar vilja ekki að þjóðin dreifist út um allar koppagrundir eða hírist í fátækt á skerinu gamla, verða viðkomandi aðilar að breyta um stefnu. Viðbrögð ykkar við stefnu AGS er það sem mun gera ykkur ábyrg í næstu Rannsóknarskýrslu Alþingis. Viðbrögð Alþingis, ráðherra og fjölmiðla við stefnu AGS mun ákvarða kjör almennings á Íslandi til framtíðar.

 

Er einhver munur á AGS eða ESB?

Alþjóðagjaldeyrissjóðurinn og Evrópusambandið slitu viðræðum við Ungverja sökum þess að þeir samþykktu ekki kröfur AGS og ESB. Auk þess voru Ungverjar með óæskilegar hugmyndir að mati AGS/ESB.

Ungverjar vildu ekki skera jafn mikið niður og AGS/ESB kröfðust. Skoðun Ungverja er sú að nóg sé komið af niðurskurði hjá almenningi og fyrirtækjum. Hinar yfirþjóðlegu stofnanir-AGS/ESB-töldu að skera ætti meira niður en munurinn er sá að Ungverjar kusu viðkomandi ríkisstjórn nýlega og hún ber ábyrgð gagnvart sínum landsmönnum. Hinar yfirþjóðlegu stofnanir AGS/ESB voru ekki kosnar og hafa því enga lýðræðislega ábyrgð gagnvart þegnum viðkomandi landa. Þessar stofnanir sjá vandamálin sem excel skjöl og mannúð eða velferð er ekki til í þeim reikniforritum.

ESB vill meina að Ungverjar séu ekki búnir að gera heimavinnuna hvað varðar breytingar á flutningakerfi sínu(lestakerfi), heilbrigðiskerfi og menntakerfi. Með öðrum orðum að einkavæða.

Ungverjar voru svo ósvífnir að koma á sérstökum skatti á bankastarfsemi. Sex alþjóðlegir bankar sem starfa í Ungverjalandi kvörtuðu því við AGS/ESB og hlutu greinilega góða áheyrn því AGS/ESB lögðust gegn þessum hugmyndum Ungverja, umsvifalaust.

Ungverjar vildu einnig koma skuldsettum heimilum til aðstoðar með sérstökum sjóði en AGS/ESB voru á móti því einnig.

Ríkisstjórn Lettlands hefur háð svipaða rimmu við AGS/ESB, bæði hvað viðkemur niðurskurði og aðstoð við skuldsett heimili en borið lægri hlut fyrir hinu yfirþjóðlegu yfirvaldi.

Það er augljóst að AGS/ESB bera hag banka og fjármálafyrirtækja fyrir brjósti sér mun frekar en almennings í viðkomandi löndum. Vert er að minna á að kreppan er orsökuð af geðveiku framferði banka en ekki almennings-það voru bankarnir sem hringdu í okkur í tíma og ótíma og nánast tróðu nýjum lánum ofaní kokið á okkur.

Annað sem er augljóst er að stefna og skoðun þessara stofnana-AGS/ESB-er nánast eins. Þess vegna má segja að lítill munur sé á viðhorfum þessara stofnana hvernig bankakreppur eru leystar. Báðar stofnanir telja raunhæft að láta almenning borga brúsann fyrir bankakerfið og mistök þeirra. Að minnsta kosti lekur ekki slefan á milli þeirra í viðbrögðum við hugmyndum Ungverja/Letta/Grikkja um lausn kreppunnar.

Íslendingar geta prísað sig sæla að hafa bara AGS hér á landi-eða hvað?

 

AGS og ESB fresta viðræðum við Ungverja

Mótmæli bera árangur

Síðustu tvær vikur hafa verið nokkuð merkilegar. Daglega hefur verið mótmælt, fyrst fyrir utan Seðlabanka Íslands og síðan fyrir utan skrifstofu Alþjóðagjaldeyrissjóðsins sem er staðsett fyrir ofan Stjórnarráðið. Flesta daga hefur verið einhver umræða um þessi mótmæli í fjölmiðlum. Ég hef fundið það glöggt að AGS er að komast inn í umræðuna. Tekist hefur að draga athyglina að sjóðnum og starfaðferðum hans. Almenningur er farinn að vefengja góðmennsku sjóðsins gagnvart almenningi. Með dómi hæstaréttar og viðbrögðum opinberra aðila kristallast vel að starf AGS snýst um að slá skjaldborg um banka og þess háttar fyrirtæki.

Þetta kennir okkur að það eina sem virkar gegn AGS eru mótmæli. Þau vekja umræðu og blaðaskrif. Mótmælendur koma fram með sjónarmið sem fjölmiðlar verða að kynna sér og umræðan breytist þannig almenningi til hagsbótar. Það dugar skammt að ræða málin í góðra vina hópi heldur verða allir að sameinast um að sýna sig þegar mótmæli eru höfð í frammi gegn AGS. Auk þess er nauðsynlegt að leggja af alla sérvisku hvort einhver sé þess verður að taka þátt í mótmælum með viðkomandi. Við erum öll ólík en verðum að geta sameinast gegn AGS ef við viljum að Ísland verði byggilegt land fyrir börnin okkar.

Nú erum við í skúffu...AGS

Þeir einstaklingar sem hafa fylgst vel með framvindunni á sölu auðlinda landsins til erlendra aðila eru í raun ekki hissa í dag. Við erum meira "skúffuð". Að íslenskum stjórnvöldum takist að afsala sér framleiðslu í 130 ár á auðlind, sem á eftir að verða dýrmætari með hverju árinu, er í raun svik við almenning í landinu. Núna þegar við þurfum sem mest að afla fyrir þjóðina til að vinna okkur út úr kreppunni gerist slíkt afsal á framtíðartekjum okkar. 

Það er vilji AGS að við færum auðlindir landsins úr eigu almennings í einkaeigu. Í skýrslu AGS frá því í apríl s.l. er talið að auðlindir í eigu almennings séu hindrun fyrir efnahagsbata " Constraints on the reallocation of resources from non-tradable to tradable sectors—" Ags telur nauðsynlegt að víkja hindrunum úr vegi fyrir einkavæðingu auðlinda okkar. Þeim hefur greinilega orðið ágengt.

Stefna AGS á Íslandi er aðgengileg á netinu og saga AGS segir okkur að auðlindir landa eru einkavæddar. Þess vegna hefði núverandi vinstri stjórn og stuðningsmenn hennar átt að vera á tánum. Að þetta gerist er merki þess að svo hafi ekki verið. Það er augljóst að ríkisstjórnin er sammála þessu þó Svandís hafi dottað. 

Það er ákaflega sorglegt að upplifa það hvernig afsalið gengur í gegn um hábjartan dag án mikilla mótmæla. Samfylkingarmenn eru annað hvort stóriðjusinnar eða svo miklir ESB sinnar að þeir setja sig ekki upp á móti AGS. VG-liðar eru svo glaðir með völdin að öllu er til fórnandi til að sleppa því að mótmæla núna á Austurvelli.

Því miður mun þetta sjálfsagt ganga eftir og síðan munu fleiri auðlindir okkar fara sömu leið. Fólk ætlar bara að nöldra á Facebook.

Vill fund um Magma í iðnaðarnefnd

Hvers vegna ræður hugmyndafræði AGS á Íslandi

Grein sem birtist eftir mig á Smugunni 28 maí 2010.

Á stjórnmálaumræða dagsins að snúast um ísbirni og snjó í Bláfjöll eða á umræðan að snúast um hvers vegna Ísland virðist vera að glata sjálfstæði sínu, eigum sínum og sjálfu sér?

Hverjar eru áhyggjur fjölmiðlamanna/almennings í dag? Í raun er ekki hægt að greina hvor hópurinn hefur frumkvæðið í umræðu dagsins sökum getuleysis fjölmiðlanna. Algengt er að umræða fjölmiðlanna snúist um það sem skjólstæðingum viðkomandi fjölmiðils kemur best í umræðunni. En spurningarnar snúast um skoðanakannanir, hverjum þú vilt vinna með, og einhverjar spurningar um einstök mál sem skipta ekki öllu máli í stóru myndinni.

Ef við könnum það sem að öllum líkindum skiptir þjóðina mestu máli, og þar með talin sveitafélögin, er að þann 7. apríl síðastliðinn skrifuðu Jóhanna, Steingrímur, Gylfi og Már undir viljayfirlýsingu við Alþjóðagjaldeyrissjóðinn.  Viljayfirlýsingin og skýrsla AGS eru aðgengileg á netinu. Þar kemur fram að viðkomandi ráðamenn lofa fyrir hönd Íslands að fara í einu og öllu eftir fyrirmælum AGS. Auk þess lofa þau, að bera allt sem þeim kynni að detta í hug að framkvæma, fyrst undir sjóðinn til að vita hvort sjóðurinn sé sammála þeim.

Hér finnst mér vera verðugt efni í umræðu við fulltrúa VG og Samfylkingarinnar í Reykjavíkurborg. Ástæða væri að spyrja út í afstöðu þeirra til þessa valdaafsals á fullveldi Íslands. Þetta er í raun stórpólitískt mál. Þegar við síðan upplifum að HS Orka er seld erlendu fyrirtæki í óþökk Íslendinga er spurningin hver ræður för.

Mjög athyglisvert var að fylgjast með fréttum af fundi sem haldinn var í New York daginn eftir að skrifað er undir viljayfirlýsinguna , þ.e. 8 apríl. Í fréttum kemur fram að á fundi íslensk-ameríska viðskiptaráðsins var rætt um mögulegar fjárfestingar í orkugeiranum á Íslandi. Á fundinunum voru mættir Gylfi ráðherra, Flanagan yfirmaður áætlunar AGS á Íslandi, Árni Magnússon frá Íslandsbanka og Ásgeir Margeirsson frá Magma. Þessi samkoma hafði alla höfuðgerendurna við sölu á HS Orku, allt undir handleiðslu AGS.

Sporin hræða, saga sjóðsins er ekki falleg. Nýleg rannsókn á vegum Center for Economic and Policy Research í Whasington sýndi fram á að af 41 landi sem sjóðurinn skipti sér af versnaði kreppan hjá 31 landi vegna ráðstafana sjóðsins. Joseph Stiglitz hefur varað við sjóðnum lengi og bent á hversu kostnaðarsamt er taka mikið af lánum. Sá kostnaður sé oft jafn mikill og niðurskurðurinn á velferðinni.

Í frægu viðtali við Greg Palats segir Joseph frá því að sjóðurinn sendi alltaf sama lyfseðilinn án tillits til aðstæðna. Í viðtalinu segir han: „Step One is Privatization - which Stiglitz said could more accurately be called, 'Briberization.' Rather than object to the sell-offs of state industries, he said national leaders - using the World Bank's demands to silence local critics - happily flogged their electricity and water companies. "You could see their eyes widen" at the prospect of 10% commissions paid to Swiss bank accounts for simply shaving a few billion off the sale price of national assets“.

Í skýrslu AGS dagsett 8. Apríl 2010 kemur fram á bls 7 óánægja AGS með þær hindranir sem eru á Íslandi við að færa auðlindir landsins úr eigu hins opinbera yfir til einkaaðila. Það kemur greinilega fram í skýrslunni að ef ekki verði mikil fjárfesting í auðlindum okkar sé mjög hæpið að áætlun sjóðsins gangi upp á Íslandi.

Núna er frumvarp til afnáms vatnalaganna frá 2006 í nefnd. Talið er að lögin frá  2006 séu mjög haldlítil til að verjast ásælni einkaaðila í eina stærsu og verðmætustu auðlind okkar Íslendinga, vatnið. Þess vegna er nauðsynlegt að koma í veg fyrir að vatnalögin frá 2006 öðlist gildi þann 1 júlí. Það mun verða lærdómsríkt að fylgjast með þeirri lagasetningu.

Stjórnmálahreyfingin Vinstri grænir er það stjórnmálaafl sem barist hefur mest gegn sölu auðlinda okkar til einkaaðila. Öruggt má telja að allir kjósendur VG séu á þeirri skoðun að auðlindirnar skulu vera í eigu þjóðarinnar. Viðkomandi stjórnmálaafl er í ríkisstjórn. Þeir sem voru mest áberandi í búsáhaldarbyltingunni voru VG. Þegar skipta þurfti út ríkisstjórn Geirs Haarde vantaði ekki kraftinn í ungliðahreyfingu VG. Þetta veit ég því ég var á staðnum.

Eftir að Steingrímur komst til valda varð ég mjög einmanna á Austurvelli, VG-liðar fóru heim að grilla. Við vorum nokkur eftir á Austurvelli sem bíðum enn eftir gagnsæi, heiðarleika og siðbót. Við höfum mótmælt Icesave en síðast en ekki síst höfum við reynt að mótmæla AGS. Vinstri menn á Íslandi mótmæla ekki AGS, það er heimsundur því allir vinstri menn eru á móti AGS. Grikkir eru brjálaðir. Allar verkalýðshreyfingar eru á móti AGS, ekki ASÍ, það er líka heimsundur.

Næsta vetur verða skuldugar fjölskyldur á Íslandi að standa í skilum, á eigin spýtur. Frestun á nauðungarsölum verður hætt. Afleiðingin verður að hundruðir fjölskyldna lenda í verulegum vandræðum, missa heimilin. Þeir sem hafa neitað að borga bönkunum til að eiga fyrir mat þurfa að fara greiða húsaleigu og sleppa mat. Það kemur skýrt fram í skýrslu AGS frá 8 apríl sl. að þetta er vilji AGS og kvarta þeir undan linkind ríkisstjórnarinnar við að halda almenningi volgum og bíðandi eftir lausn, sem aldrei var fyrirhuguð eins og sjóðurinn bendir á.

Vinstri menn hafa dregið sig niður í sófana til hugmyndafræðilegra rökræðna eftir að þeir óðu táragasið fyrir Steingrím. Ef vinstri menn eða bara allir hugsandi Íslendingar ætla sér að láta stjórnvöldum eftir að stjórna, má það ljóst vera af framan sögðu að það stefinr í mikið óefni hjá íslenskri þjóð. Íslenska ríkisstjórnin er millistjórnandi milli okkar og AGS. Ef þjóð, landi og auðlindum á að verða bjargað verður þessi þjóð að horfast í augu við raunveruleikann, láta afréttara eins og Jón Gnarr eiga sig og einbeita sér að því að koma landinu undan stjórn Alþjóðagjaldeyrissjóðsins.

 

Gömul Moggagrein til uppryfjunar

Skelli inn næstum ársgamalli Moggagrein eftir mig því sumir halda að ég sé eitthvað svartsýnni á tilveruna núna, ég myndi frekar telja mig bjartsýnni í dag ef eitthvað er.

ÞEIR FISKA SEM RÓA:

Veiðiskapur er sport, beitan er valin af innsæi, fiskurinn þreyttur og síðan dreginn að landi. Þar fær hann síðan náðarhöggið. Við vorum skuldlaus þjóð og því nokkuð sjálfstæð. Í dag erum við skuldug og ósjálfstæð þjóð. Við bitum á agnið, afbrot okkar var að láta glepjast en núna situr öngullinn fastur og það er sárt.

Það er verið að þreyta okkur núna. Stýrivextirnir lækka ekki neitt af ráði. Afleiðingin er að fleiri fyrirtæki komast í þrot. Atvinnulausum fjölgar. Þar með er kominn ásættanlegur grundvöllur fyrir launalækkunum. Af þeim sökum minnka tekjur ríkisins verulega, bæði beinir og óbeinir skattar minnka. Þar með er einnig kominn grundvöllur fyrir launalækkun opinberra starfsmanna og síðan verulegur niðurskurður hjá hinu opinbera.

Til að tryggja þetta ástand til frambúðar munum við samþykkja IceSave samninginn í sumar.Við verðum að framleiða eins mikið af vörum sem gefa gjaldeyri og við getum. Ál og fisk. Það viljum við gera til að standa í skilum. Það vilja líka þeir að við gerum sem voru svo góðhjartaðir að lána okkur til að bjarga okkur frá vandræðunum, sem öngullinn veldur okkur. Því vinnur veiðimaðurinn ötull að því að hámarka afrakstur veiði sinnar.

Fljótlega mun þjóðin framleiða eins mikið og hún getur. Þjóðinni mun vera greitt eins lágt kaup og framast er unnt til að halda framleiðslukostnaðinum niðri. Það mun hámarka afraksturinn úr verksmiðjunni Íslandi. Það mun gera okkur kleyft að greiða niður lánin og taka ný. Í stað þess að hagnaður okkar, vegna vinnu okkar, fari í okkar vasa mun hann streyma óhindrað í vasa lánadrottna okkar.Nú er okkur bent á að með aukinni stóriðju muni okkur ganga betur að greiða skuldir okkar. OECD er búið að gefa línuna. Til stóriðju þarf lán. Lánveitendurnir skella okkur í ruslflokk lánshæfismatsins til að stilla af vaxtabyrði okkar, sér í hag. Síðan mun hver stóriðjan af annarri fylgja í kjölfarið og við höfum ekkert um málið að segja.

Lánadrottnarnir stjórna og stýra, þannig er það hjá gjadþrota heimilum og eins er það hjá gjaldþrota þjóðum.Eina spurningin sem út af stendur er hvort eða hvenær þeim þóknast að veita okkur náðarhöggið. Sennilega munu þeir ekki gera það. Mun arðvænlegra er að setja okkur í kvíar til hámarks nytja.

Að velta því fyrir sér hvað Davíð, Solla eða Geir gerðu er tímasóun. Jafn glórulaust er að velta sér upp úr því hvað Jóhönnu dettur í hug. Önglar hafa þá náttúru að sitja fastir. Veiðimaðurinn á næsta leik.Niðurstaðan er sú að íslensk þjóð er komin í kvíar lánadrottna sinna. Við munum strita og púla þangað til síðasta lánið er greitt og það mun taka okkur marga áratugi. Hver er sinnar gæfu smiður.....

Ísland er glatað, þökk sé núverandi ríkisstjórn

Sorry folks þið þurfið að borga hærra raforkuverð, en ég er áleiðinni til Brussel sem ríkisstarfsmaður gæti Árni Þór verið að segja okkur almenningi. Ríkisstjórninni er slétt sama þó Magma eignist HS Orku og hækki hjá okkur raforkureikningana. Ef þeim(VG) væri einhver alvar þá hefðu þau gripið í taumana miklu fyrr.

Ögmundur sprettur fram í Kastljósinu og hneykslast mjög. Þrátt fyrir það hefur hann haft langan tíma sem Alþingismaður til að fylgjast með þróuninni og ólíkt meiri völd til að vera með á nótunum. Steingrímur kemur svo kvöldinu seinna og barmar sér mikið.Hann hefði svo gjarnan viljað hafa hlutina öðruvísi en gafst bara ekki ráðrúm því Magma fylgdi ekki tímaáætlun hans. Ef raunverulegur vilji hefði verið þá hefði þingflokkur VG getað afstýrt því að HS Orka hefði lent í eigu erlendra aðila eins og yfirlýst kjarnastefna hreyfingarinnar VG er. En ekkert gerðist. Niðurstaðan er að Árni Þór er voða sorry en ekkert hægt að gera, svona eins og snjóflóð hefði lagt eitt sveitarfélag í rúst. Til hvers eru pólitísk samtök eiginlega, til að framkvæma stefnu eða skaffa útvöldum vinnu?

Það er hálf skitt að hafa lagt traust sitt á að VG myndi að minnsta kosti sitja þversum við sölu á auðlindum landsins og komast að því að maður var hafður að fífli eftir allt saman. Er starfsemi VG grundvölluð á þeirri hugsjón að halda nöldrurum eins og mér til hlés meðan auðvaldið sópar til sín almannaeigum? Steingrímur, hvers vegna ertu í pólitík?

Ef við ræðum málin í alvöru þá er staðreyndin sú að Alþjóðagjaldeyrissjóðurinn er mjög hrifinn af einkavæðingu. Hann vill að auðlindir almennings færist yfir í einkaeigu og það veldur sjóðnum ekki andvöku þó það valdi því að almenningur þurfi að borga mun meira fyrir nauðþurftir eins og rafmagn og vatn. Bara að hagnaður verði á framleiðslunni.

Þar sem AGS er á Íslandi og þar sem Steingrímur hefur skrifað undir með sinni eigin hendi að hann muni ekki framkvæma neitt án samþykkis AGS, sjá hér eru afrit úr Viljayfirlýsingu Steingríms og Jóhönnu til Alþjóðagjaldeyrissjóðsins:

Reykjavik, April 7, 2010

Dear Mr. Strauss-Kahn:

4.   We believe that the policies set forth in this and previous letters are adequate to
achieve the objectives of our program. We stand ready to take any further measures that may become appropriate for this purpose. We will consult with the Fund on the adoption of any such
measures and in advance of revisions to the policies contained in this letter, in accordance with the Fund’s policies on such consultation.

21.      Progress in covering our financing need will continue to be assessed during quarterly program reviews. In the event of further delays to financing, we stand ready to
consult with the Fund on any additional measures that would prove necessary to meet program objectives (consistent with our undertaking in paragraph 4 above).

 

Þau tvö, einstaklingarnir sem kynntu sig sem gæslumann litla mannsins og samhjálpar í kosningunum  eru núna í gíslingu AGS. Hjarta heimsauðvaldsins. Þau hafa skrifað undir að fylgja auðvaldinu í einu og öllu. VG og Samfylkingin gera eins og auðvaldið segir þeim að gera. Ef þau væru trú sinni sannfæringu um að verja kjör litla mannsins myndu þau segja AGS til syndanna og láta öðrum eftir að vera taglhnýtingar AGS. Þess í stað taka þau það hlutverk að sér möglunarlaust. Þetta segir mér það að þau eru að þessu til að halda völdum.

Ísland er glatað, það eina sem getur bjargað landinu er að almenningur kynni sér málin á eigin spýtur. Myndi sér skoðun og mótmæli kúgun AGS. Þar sem akkúrat ekkert slíkt er í pípunum mun landið og sjálfstæði þess fara lóðbeint í vasa lánadrottna, þökk sé núverandi "VINSTRI STJÓRN".

 

 

 

Óttast hærra orkuverð til almennings

Núna hefst slátrunin í boði velferðarstjórnarinnar

Ýmsir sáu þetta fyrir. Þeir sem hafa kynnt sér sögu Alþjóðagjaldeyrissjóðsins vita að velferðin fer illa út úr samstarfi við hann. Rannsóknir hafa sýnt að misrétti í velferð og aukning á sjúkdómum fer eftir því hver lánar löndum peninga sem eru í kreppu. Þegar AGS lánar eru skilyrðin óvægin og dánartíðni ýmissa sjúkdóma verður hærri en ef einhver annar lánar.

Einnig er það vel þekkt að þau lönd sem veita sjóðnum viðnám koma betur út úr kreppum en rassasleikjurnar.

Ástandið á Íslandi er kolklikkað og virðist brautin vera lárétt niður á nýlendustig á nýjan leik.

Samfylkingin er til í að fylgja AGS því þá komumst við frekar inn í ESB.

Steingrímur vill fylgja AGS því þá heldur hann völdum. Sennilega heldur hann líka að hann sé skástur.

Fjölmiðlar hafa lítið kynnt sér AGS og samskipti sjóðsins við Ísland. Oftast éta þeir upp fréttatilkynningar ráðuneytanna hér heima eða af heimasíðu AGS. Stundum viðtal við ráðherra sem segja það sem þeim sýnist og engar gagnrýnar spurningar fylgja. Það virðist ekki vera nein fagmennska ráðandi hjá fjölmiðlum því ekki hefur komið fram neinn fréttamaður sem sérhæft hefur sig í AGS. Ef slíkt myndi gerast myndi viðkomandi gera harða hríð að ráðamönnum sökum þeirrar ógnar sem okkur stafar af sjóðnum.

Það segir mér að flestir fréttastjórnendur styðja ríkisstjórnina.

Almenningur sem treystir þessum máttarstólpum lýðræðisins er leiddur til slátrunar eins og hvurt annað sláturfé.

Velferðarþjónustan skorin niður