Sá á kvölina sem á völina-stórmenni eða dusilmenni

Núna er ég komin norður í Skagafjörð, raunar á Sauðárkrók. Dvel hjá mági mínum í góðu yfirlæti. Þegar vinnufélagarnir kvöddu mig í dag þá báðu þau mig að nota tíman hér fyrir norðan til að leysa vandamá Íslands. Sem sagt kippa kreppunni í liðinn. Vandamálið er í raun mjög hefðbundið. Við vitum nokkurn vegin hvaða leiðir eru í boði. Vandamálið er að velja sér leið til árangurs. Sá á kvölina sem á völina. Þannig er það bara.

Sú leið sem núna er mörkuð er að taka ný stór lán hjá AGS. Þau á að geyma í banka í Bandaríkjunum. Sú vissa að við Íslendingar höfum annarra manna fé á bankabók þar ytra á okkar kennitölu á víst að liðka fyrir því að útlendingar vilji versla við okkur. Þannig, fyrir þá sök að peningar liggja á bankabók, eiga hjól atvinnulífsins á Íslandi að fara að snúast á ný. Málið er víst þannig vaxið að ef við höfum bankabók í USA fulla af peningum sem við höfum fengið að láni þá séu enn aðrir til í að lána okkur enn meiri pening til að atvinnustarfsemi á Íslandi geti þrifist. Til að við komust yfir þennan Lottóvinning verðum við líka að borga IceSave, sennilega til að gulltryggja það að við sjáum örugglega ekki til sólar fyrir skuldum. Síðan hefur Samfylkingin komið því svo haganlega fyrir, sennilega af umhyggju fyrir lánadrottnum okkar, að koma okkur inn í ESB. Þá þurfa lánadrottnar okkar ekki að vera að þvælast til Íslands til að rukka okkur heldur geta stýrt öllu saman frá Brussel.

Eins og hverjum Íslendingi mætti vera ljóst þá hugnast engum Íslendingi þessi leið. Við erum nýbúin að stunda mikið lánafyllerí undanfarin ár. Miklu frekar eigum við að hverfa af þeirri braut og reyna að þurrka okkur upp. Það er nú ekki einfalt, því róninn á það til að komast ekki úr ræsinu nema láréttur.

Hin leiðin og sú sem ég tel vænlegri er leið sjálfstæðis, frelsis og án miðstýringar heimsins. Sú leið er eitur í beinum alheimslánveitenda. Sú leið felur í sér að hafna öllum lánum frá AGS. Borga IcesaVe að því marki sem lög skylda okkur til. Skera niður kostnað á Íslandi á okkar eigin forsendum fyrir okkur. Auka útflutningstekjur með auknum veiðum. Hækka rafmagnsverð til stóriðju. Nurla og spara fyrir okkur sjálf, ekki AGS. Þetta er vel gerlegt en flestir Íslendingar með meðalgreind hafa áttað sig á að hún er ófær.

Ástæðan er einföld. Sú kvislingaríkisstjórn sem situr við völd er ekki reiðubúin að taka slaginn. Hefur ekki þann manndóm sem þarf. Þannig er staðan í dag. Þá er alltaf möguleiki, ef menn eru ekki sáttir, að gera byltingu. Ég tel þennan möguleika nánast útilokaðan. Til þess að framkvæma byltingu þarf pening og þá höfum við ekki. Lenín og Hitler fengu peningastyrki frá austurströnd Bandaríkjanna á sínum tíma. Sennilega njótum við ekki slíkrar fyrirgreiðslu í dag á Íslandi.

Því er bara ein lausn eftir. Flytja þangað sem það er skárra að búa. Það hefur mannskepnan alltaf gert. Þannig mun það einnig verða á íslandi. Útrásarvíkingarnir og ríkisstjórnin munu búa í vellystingum á erlendri grund en við hin munum vinna þar sem við höfum það skaplegt.

Marsbúar á Íslandi

In the extremely unlikely event that the Icelandic government wasn’t in a position to meet all claims, all the Nordic countries have an arrangement where they will step in and help any one of the participating countries that are in trouble so there is an additional layer of reassurance and cover.

Þessa merkilegu tilvitnun fann ég á bloggsíðu Jakobínu. Tilvitnunin vekur upp óþægilegar spurningar. Er það þannig að Norðurlandaþjóðirnar hafi með sér samkomulag? Samkomulag að ef einhver þeirra er í vandræðum með sitt eigið "IceSave" þá muni hinar hjálpa til. Hvers vegna deila þá ekki Norðurlandaþjóðirnar með okkur byrðunum af IceSave. Eru eigin vandræði vinaþjóða okkar svo mikil í kreppunni að þau telji vænlegast að við borgum IceSave ein. Eða telja þau okkur svo mikla fjárglæframenn að við eigum ekki annað skilið en að borga þetta sjálf.Að minnsta kosti vilja vinir okkar á Norðurlöndunum að við göngum alveg frá IceSave málinu áður en þau láni okkur svo mikið sem eina krónu.

Lán vinaþjóða okkar frá Norðurlöndunum er forsenda þess að AGS haldi áfram að hjálpa okkur, IceSave málið er forsenda þess að Norðurlöndin hjálpa okkur. Því er dagskráin ákveðin. Fyrst samþykkjum við IceSave, þá geta Norðurlandaþjóðirnar veitt lán sín og að því loknu getur AGS haldið áfram að hjálpa litla Íslandi. Hvað er til ráða?

Margt hefði verið hægt að gera fyrir hrun til að afstýra þessu. Gáfnaljósin í Samfylkingunni höfðu besta tækifærið af öllum til að bjarga íslenskri þjóð. Þau kusu frekar að koma okkur inn í ESB. Því fóru hagsmunir Samfylkingarinnar saman við hagsmuni eigenda alþjóðlegs fjármagns. Því sitjum við, meðal annars, í súpunni í dag.

Þegar Sigríður Inga Samfylkingarkona kvartar yfir Jóni Ráðherra vegna þess að hann skilur tilveruna, finnst manni eins og Marsbúi hafi komið í viðtal í sjónvarpið, þvílík er veruleikafyrringin hjá Samfylkingunni.

Spurningin  hvað er til ráða með Marsbúa í áhöfninni. Ekki margt tel ég. Dagskráin er prentuð með leyfi Samfylkingarinnar. Spurningin er hvort við getum hafnað AGS og reynt að standa á eigin fótum. Sá möguleiki er mjög fjarlægur þar sem Marsbúarnir ráða för. 

 

Nútíma þrælahald

Það er fátt sem gefur tilefni til bjartsýni þessa dagana. Ef við samþykkjum Icesave þá munu skuldir landsins verða óviðráðanlegar. Á sama tíma segja matsfyrirtæki, bankar og AGS að við samþykkt samningsins séu svokallaðar "lánalínur" opnar. Þ.e.a.s. við verðum ekki Kúba norðursins. Það virðist vera að til að gera sem flesta hamingjusama í nágrannalöndunum sé að þiggja sem mest lán af viðkomandi löndum.

AGS virðist vera miðlægur í þessu ferli. Hann hefur bútað niður aðstoðina til okkar og útdeilir henni í smápörtum. Sama aðferð og ég beiti við hundinn minn. Ef ég er með heila pulsu þá ríf ég hana niður í litla hluta og hvutti fær síðan bitana eftir því hversu þóknanlegur hann er. Ef Íslendingar gera ekki þetta eða hitt þá kemur ekki næsti biti frá AGS. 

Þegar búið verður að skuldsetja okkur í botn þá þurfum við að borga, að sjálfsögðu. Þar sem við erum rík af auðlindum er hægt að skuldsetja okkur mikið. Skuldsetningin mun miðast við að við getum borgað, rétt svo. Til að tóra munum við þurfa að selja auðlindir okkar, skera niður allan óþarfa kostnað eins og heilbrigðis- og menntakerfi. Allt þetta til að framleiða eins mikinn gjaldeyri úr áli og fiski og við getum.

Þar sem við erum með málþóf á Alþingi vegna Icesave þá er þegar farið að hóta okkur. AGS gefur í skyn að ekki fáist áframhaldandi fyrirgreiðsla frá honum. Matsfyrirtækin og Norræni fjárfestingarbankinn hóta líka.

Ef við fellum Icesave samninginn þá mun öllu verða skellt í lás. AGS kippir að sér hendinni. Hin löndin sem ætluðu að lána okkur hætta við. Matsfyrirtækin setja okkur í ruslflokkinn. Ísland verður Kúba norðursins. Neikvæð fjölmiðlaumræða úti í heimi mun drekkja okkur. Ég sé ekki neina lausn á þessari stöðu okkar.

Ég tel einsýnt að við stefnum í skuldafen og þrældóm. Eina spurningin er hversu margir munu vera eftir á Íslandi til þess að borga skuldirnar.

Akkilesarhæll Íslands

Þar með er það enn einu sinni staðfest. Íslendingar eiga að samþykkja Icesave samninginn til að það opinberist ekki að regluverk ESB er meingallað. Reglur sem samdar voru af gáfnaljósunum í Brussel til að eigendur bankabóka gætu treyst bönkum fyrir fjármunum sínum. Ísland er skólabókardæmi um að reglurnar eru meingallaðar. Það má ekki komast upp og því skulu Íslendingar borga hvað sem það kostar.

Það sem er þó verst af öllu að Icesave samningurinn er tengdur umsókn Íslands um aðild að ESB. Það kemur mjög skýrt fram í því viðtali sem Mbl vitnar í í hollenskum fjölmiðlum. Þar tekur hollenski utanrikisráðherrann af öll tvímæli um þetta atriði. Þar með hefur hann gert all nokkra íslenska ráðherra að ósannindamönnum.

Eftir lestur þessarar fréttar Mbl er það kristaltært að viðsemjendur okkar þurftu alls ekkert að hóta okkur mikið. Nei tromp þeirra er ást Samfylkingarinnar á ESB. Hjörtu Samfylkingarinnar og ESB virðast slá í takt. Það virðist vera koma æ betur í ljós að snöggi bletturinn á Íslendingum, Akkilesar hællinn, gagnvart ESB og Icesave er Samfylkingin. Það ætti að vera nokkuð augljóst að ef allir stjórnmálaflokkar væru andsnúnir inngöngu okkar í ESB hefðu menn hagað sér öðruvísi. Það er sárt að þurfa að minna vinstri menn á að sameinaðir stöndum við en sundraðir föllum við.  

 

 

Þrýst á Íslendinga

Er það hagur VG að allt fari aftur á steinöld því þá verður allt svo "grænt".

Það er farið að læðast að manni illur grunur. Þeir einstaklingar sem fá að sjá leyniskjöl um Icesave samninginn eru ekki samir á eftir. Hárin rísa á höfði þeirra, nema að sjálfsögðu Steingrími. Orðrómur er á kreiki um að við eigum engra kosta völ. Til að greiða Icesave og aðrar skuldir verðum við að virkja enn meira og reisa enn fleiri álver. Er það skýringin á algjörri uppgjöf Steingríms gagnvart Alþjóðagjaldeyrissjóðnum að öll þingstörf séu bara formsatriði.

Sú leynd sem er á ýmsum staðreyndum gerir almenningi mjög erfitt um vik. Er hugsanlegt að látið sé í veðri vaka að við séum í vonlausri aðstöðu svo við séum ekki með múður. Svo að við samþykkjum Icesave í þeirri trú að við getum ekkert annað. Ég tel að það sé borgaraleg skylda allra sem vita sannleikann að opinbera hann.

Atburðir síðustu mánaða bera þess glögg merki að allir eru að tapa nema lánadrottnar. Þeir halda sínum hlut. Almenningur og fyrirtæki skulu blæða þangað til þau geta ekki greitt meir. Allt til þess að lánadrottnar beri ekki nokkurn skaða af kreppunni. Hugsanlegt er að það samrýmist stefnu VG því ef allir flytja af landi brott mun náttúran blómstra án mannskepnunnar á Íslandi, virkilega grænt, ekki satt?

Margar orrustur hafa verið háðar án fyrirfram gefinnar niðurstöðu og óvissra lykta. Því er aðstaða okkar Íslendinga ekkert óvenjuleg. Meðan við vitum ekki betur tel ég best að taka slaginn og falla með sæmd, eða sigra

 

 

 

 

Bastillu dagar framundan.

Landsmenn botna ekkert í Vinstri Grænum. Þeir hafa svikið öll kosningaloforðin sem ég man eftir enda skammt frá síðustu kosningum. Gömlu karlarnir voru búnir að bíða svo lengi. Nú á að njóta sem lengst hvað sem það kostar. Það er í raun eina skýringin. Að sterkasta stjórnmálafl landsins gegn ESB sækir svo um aðild að ESB, það eru bara ekki svik, það má frekar flokka sem geðveilu.

Ef það væri venjulegt árferði á Íslandi væri öllum kannski sama þó sú geðveila riði húsum við Austurvöll. Það er stórhættulegt núna þegar íslensk þjóð er á ögurstundu. Það er eins og menn taki einhverja sótt þegar þeir verða hluti af aðlinum. Eitt aðaleinkenni þessarar sóttar er að almenningur á mjög erfitt með skilja málflutning ráðherranna. Skýringin gæti verið að þeir stunda kappræðu í stað rökræðu. Sú kappræða virðist gersneidd gagnrýnni hugsun. Þar sem almenningur sinnir störfum sínum almennt af alúð og skynsemi virðist hann eiga í erfiðleikum með að skilja rakalausan verksmiðjuframleiddan málflutning Vg.

Að Vg "nenna" ekki að reikna út afleiðingar Icesave er mjög alvarlegt. Samningurinn er ofviða íslenskri þjóð. Þegar um er að ræða jafn alvarlegt mál verða menn bara að nenna að sinna vinnunni sinni. Annars gæti margt óvænt gerst á Íslandi.

Innsæi Steingríms og frumþörf fólks.

Umrótið á Íslandi er svo mikið þessa dagana að það nálgast byltingu. Fólk setur spurningarmerki við flest allt, véfengir flest, treystir engu. Svolítið frábrugðið 2007 þegar allt var svo pottþétt. Reyndar virðist þjóðin upp til hópa vera róleg, hópast ekki á Austurvöll að minnsta kosti. Aftur á móti virðist hún vera búin að gera upp hug sinn gagnvart Icesave, þjóðin vill ekki borga samkvæmt þeim samningi sem fyrir liggur. Ekki að undra, staðan í dag er slæm og nánast vonlaus ef við samþykkjum samninginn.  Þjóðin sýnir ábyrgð í sinni afstöðu.

Hvað Steingrímur er að pæla er svolítið erfitt að átta sig á. Hann hefur hingað til verið talinn ákaflega ábyrgur stjórnmálamaður, svona grandvar, þið skiljið hvað ég á við. Núna vill hann að við samþykkjum Icesave, samning sem hugsanlega getur sett Ísland í gjaldþrot. Nokkuð sem hann hefði æpt sig hásan ef hann hefði verið í stjórnarandstöðu. Hefur Steingrímur alltaf verið svona mikill loddari og valdasjúkur, eða býr eitthvað meira að baki þessari afstöðu hans?

Veit hann eitthvað sem við almennir borgarar vitum ekki. Verður Ísland sett í efnahagslega sóttkví ef við samþykkjum ekki Icesave. Verðum við strax sett á hausinn? Mun Evrópusambandið senda herlið til Íslands ef við borgum ekki? Er Steingrímur valdasjúkur kerfiskarl sem hangir í stólnum eins lengi og hann getur? 

Kannski hefur Steingrímur gert sér grein fyrir því að það er vonlaust að streitast á móti. Lánadrottnar okkar ráða öllu á Íslandi. Því meiri auðmýkt því betri meðferð við íslenska þjóð. Það er augljóst að ýmsir Íslendingar hafa ekki öðlast sama innsæi í efnahagsmál Íslands og Steingrímur.

Við erum all nokkur sem teljum að Ísland eigi sér möguleika. Við trúum því enn þá að til sé réttsýnt fólk í hinum stóra heimi.  Samt sem áður læðist að manni efi, kannski verður rödd okkar fótum troðin. Slíkt hefur hent aðrar þjóðir. Þá mun þjóðin kjósa með fótunum og allir þeir sem geta munu flytja þar sem betra er að búa.

Opinn borgarafundur #13, í kvöld kl 20:00.

Opinn borgarafundur #13

Í IÐNÓ, mánudaginn 29. júní kl. 20-22.

 

Fundarefni:

IceSave - Getum við borgað?.

Frummælendur:

• Helgi Áss Grétarsson lögfræðingur
• Einar Már Guðmundsson rithöfundur
• Steingrímur J. Sigfússon fjármálaráðherra

Í pallborði verða (auk ofangreindra):

• Meðlimir úr InDefence hópnum
• Eygló Harðardóttir þingmaður
• Elvira Méndez dr. í Evrópurétti

Að vanda hefur öllum þingmönnum verið sérstaklega boðið.

Fundarform verður með sama sniði og áður, þegar frummælendur hafa lokið máli sínu er orðið gefið laust og fundargestir úr sal fá að tjá sig eða spyrja þátttakendur í pallborði spurninga.

Hver aðili hefur tvær mínútur til að tjá sig svo gott er að vera vel undirbúinn.

Iðnó mánudagskvöld kl 20:00, Opinn Borgarfundur-IceSave, getum við borgað?

Annað kvöld í Iðnó verður Opinn Borgarafundur. Efni fundarins verður IceSave, getum við borgað? Þetta er fyrsta spurningin sem allir lántakendur spyrja sig. Svarið við henni ákvarðar framhaldið. Ef svarið er nei þá taka menn ekki lánið. Ef veðin eru góð þá eru lánveitendur til í tuskið. Steingrímur er frummælandi og verður að standa fyrir máli sínu. Mjög margir Íslendingar eru því andsnúnir að taka þetta lán. Því miður virðist fjöldin þreyttur á þrasi og setur sig ekki nægjanlega vel inn í málavextir. Það er mjög mikilvægt því aðeins örfáar vikur eru þangað til Alþingi tekur afstöðu í málinu.

Mætum öll því við erum meðábyrg, að minnsta kosti eru það við sem borgum IceSave. 

Reyk-ja-vík og Jóhanna.

Það voru margir á Íslandi sem biðu spenntir eftir munnlegri skýrslu Jóhönnu í dag. Skýrslu um hversu hratt og örugglega sumir Íslendingar fara í gjaldþrot. Það var mjög sérkennilegt að hlusta á Jóhönnu. Þegar hún er loksins komin í góða aðstöðu til að hygla þeim sem minna mega sín þá verða ákvarðanirnar sem hún þarf að taka þær erfiðustu á lífsleiðinni. Svolítið sérstakt verð ég að segja. Ég hefði haldið að það yrði auðvelt að valta yfir auðvaldið og færa almúganum fé og völd.

Hún afneitaði AGS og sagði það gert fyrir almenning að staðgreiða skuldir þjóðarbúsins í einum grænum. AGS og erlendir lánadrottnar kæmu hvergi nærri þeim fyrirætlunum Ríkisstjórnarinnar. Fyrirgefið en er mig að dreyma.

Verst af öllu að fátt nýtt kom fram í ræðu Jóhönnu. Mest atriði sem þegar hefur verið fjallað um. Gerði Jóhanna sér ekki grein fyrir að við biðum með öndina í hálsinum í dag eftir ræðu hennar. Þetta var nokkurn veginn síðasti séns að standa sig. Ef þessi taktík sjálfsvorkunnsemi og stefnuleysis á að vera aðalsmerki Ríkisstjórnarinnar er ekki von á góðu. Mörg þúsund manns bíða eftir lausn sinna mála. Þá er það alls ekki ásættanlegt að þau ætli að tékka á því fólki við tækifæri .Hætta er á því að þá muni Reykjavík bera nafn með rentu.