Fáþingi-aLÞINGi gÖTUNNAr-bylting

Það var hefðbundinn laugardagur hjá okkur hjónum í dag. aLÞINGi gÖTUNNAr var á dagskrá. Konan var reyndar fundarstjóri í fyrst sinn og tókst það með ágætum. Ekki er hægt að segja að það hafi verið margmenni en kjarninn mætti. Ég var nokkra stund í Kolaportinu fyrir fundinn og útbýtti dreifimiðum og hvatti fólk til að mæta á Austurvöll. Lang flestir vissu ekki af fundunum. Þar kom berlega í ljós skortur okkar á fjármagni því ekki getum við auglýst okkur eins og bankarnir með heilsíðuauglýsingum.

Þrjár góðar ræður voru á fundinum. Sjá má hluta þeirra hér, á althingigotunnar.is.

Ræða Evu Hauks var mjög beitt. Hún benti á að alþingi götunnar er valdalaust í samanburði við hið hefðbundna Alþingi, sem hún reyndar kallaði "Fáþingi". Hennar lausn var bylting. Bylting sem felst í því að við hættum að næra núverandi valdhafa, þ.e. bankana og stórverslanirnar. Hún spurði líka þeirrar áleitnu spurningar, hvað er fólk að gera, það er að versla í búðum valdhafanna svaraði hún sjálfri sér. A.m.k. var ekki fólk að mótmæla á Austurvelli þó flestir séu ósáttir við framþróun mála í þjóðfélaginu í dag.

Þjóðin siglir áfram og reynir eftir fremsta megni að halda upp hefðbundinni iðju eins og fyrir hrun. Þjóðin er ekki sátt. Þjóðin reynir samt ekkert til að takast á við ástandið sem það er ekki sátt við nema að hverfa til gömlu taktanna, að fylgjast ekki með og láta teyma sig áfram. Það er eins og enginn vilji breytingar, manni er jafnvel spurn, hvar eru allir róttæklingarnir, geta þeir ekki sameinast um nokkrar réttlætiskröfur.

Það er sérkennilegt að hugsa til þess að ef allt verður vitlaust í kjölfar skýrslunnar þá er það meira fýlukast þjóðarinnar vegna vanhæfni sem er löngu liðin en þess óréttlætis sem viðgenst í dag. Er okkur viðbjargandi?

Eftir helgina.....

Stjórnvöld eru alltaf að segja að eitthvað jákvætt gerist "eftir helgina". Þannig hefur það verið síðan Jóhanna og Steingrímur tóku við. Síðan gerist ósköp fátt. Er þjóðin of óþolinmóð?

Óþolinmæðin á rætur sínar í forsendubresti sem varð öllum augljós haustið 2008. Þá kom það skírt fram að kjörnir fulltrúar sem treyst hafði verið fyrir stjórn landsins höfðu brugðist. Afleiðingar mistakanna voru sendar til þjóðarinnar. Þjóðin kaus nýja stjórn sem lofaði öllu fögru en er líka að senda afleiðingarnar til þjóðarinnar. Það er að renna upp fyrir þjóðinni að stjórnvöld, hvaða nafni sem þau nefna sig, eru bara senditíkur auðvaldsins við að koma reikningnum til almennings. Vandamálið hjá stjórnvöldum er að þrællinn er hugsi.

Við, þrælarnir, viljum frelsi frá valdi auðmagnsins. Hljómar eins og kommúnistaávarpið en er ljósár frá því fyrirbæri. Almenningur er farinn að gera sér grein fyrir eðli hlutanna. Fólk er að átta sig á því að ekki er sjálfgefið að greiða skuld hvað sem það kostar. Að leggja fjölskyldur og efnahag einstaklinga í rúst er of mikið til að greiða einhverja skuld. Skuld sem var búin til í tölvu, tölur á skjá sem voru fluttar frá einni bankabók í aðra bankabók og síðan að lokum í bankabók bankans. Er slíkt talnaflakk nægur grundvöllur fyrir uppboði á heimili, ævistarfi, almennings á Íslandi.

Þarna greinir þjóðina og stjórnvöld á. Forvitnilegt verður að fylgjast með því hvort þau öfl sem vilja hag almennings sem mestan beri gæfu til að snúa bökum saman. Þá þurfum við ekki að bíða neitt fram yfir helgi.

 

Norskir víkingar-2

Í hádeginu í dag(5 feb) áttum við mjög góðan fund með formanni stórs stéttafélags í Noregi, er um að ræða opinbera starfsmenn og eru félagsmenn jafnmargir og íslenska þjóðin. Þar var farið yfir stöðuna með AGS og Icesave. Einnig rætt um aðkomu íslenskra stéttafélaga að þessum deilumálum meðal íslensku þjóðarinnar. Í heildina mjög góður fundur þar sem okkur tókst að lýsa ástandinu nokkuð vel fyrir verkalýðsleiðtoganum norska.

Hverjum nýtist gróðinn, þeim eða okkur

Hvenær er rétti tíminn til að selja auðlind sem hækkar stöðugt í verði, aldrei. Hvenær er rétti tíminn til að kaupa auðlind sem hækkar stöðugt í verði, núna. Ég þvældist aðeins um viðskiptablogg vestanhafs og það er augljóst að margir bíða slefandi eftir því að hagnast vel á kaupum Magma á HS-Orku. Margir segjast ætla að kaupa hlut í Magma um leið og viðskiptin eru frágengin hér á landi. Gott fyrir Magma en hvað merkir það fyrir okkur Íslendinga.

Menn reikna með gróða, ég tel að hann sé betur kominn í vasa okkar Íslendinga.

Ross er þekktur fyrir að hámarka verð fyrirtækja sem hann kaupir og selja síðan hæstbjóðanda. Að hámarka þýðir að lækka laun og hækka raforkuverðið, þannig verður HS-Orka álitlegur pakki til sölu.

Ef við höldum eignarhaldinu innan landsins þá getum við nýtt þessa auðlind til að afla okkur vaxandi tekna og um leið ódýrrar orku fyrir landsmenn. Það lækkar reikning heimilanna og stuðlar að hagvexti heillar þjóðar en ekki einhvers eins fyrirtækis úti í heimi og hluthafa þess.

Ég óttast það mest að Steingrímur verði svínbeygður af AGS og missi þessa auðlind úr landi.

Gegn sölu orkufyrirtækja

Alþjóðagjaldeyrissjóðurinn og skólabækur

Að lokinni helgi sem hefur verið róleg í pólitíkinni er samt ýmislegt að bærast í kolli mínum. Umræðan um ríkisfjármál blundar á bakvið allt suðið í IceSave. Framundan er mjög mikill niðurskurður á ríkisútgjöldum. Ástæða þess er mikil innspýting inn á bankabækur fjármagnseigenda og endurreisn bankanna. Síðan er það vaxtagreiðslur af öllum lánunum. Niðurskurðurinn verður gríðarlega mikill næstu árin tvö sökum þess að Alþjóðagjaldeyrissjóðurinn(AGS) krefst hallalausra fjárlaga eftir 3 ár. Sú krafa er að sjálfsögðu glórulaus og hvaða tilgangi þjónar hún yfir höfuð?

Fréttir um foreldra sem geta ekki keypt skólagögn fyrir börnin sín og jafnvel tilkynna þau veik, því þau skammast sín svo mikið stakk mig þó mest.Hvar er þessi skjaldborg sem lofað var? Hvar er Norrænt velferðasamfélag? Á bara að stoppa í götin eftirá, sérstaklega ef þau rata á síður fjölmiðlanna. 

Ef saga Alþjóðagjaldeyrissjóðsins er lesin þá eigum við ekki von á góðu. AGS sker niður laun og alla styrki eða bætur til þeirra sem minna mega sín í samfélaginu. Samtímis og AGS setur okkur í gríðarlega skuld sem hefur í för með miklar vaxtargreiðslur krefst hann hallalausra fjárlaga. Niðurstaðan verður sú að nánast ekkert verður til skiptanna og alls ekki fyrir lítilmagnann. Það er ekkert sem bendir til þess enn þá að þetta gangi ekki eftir. Því má vænta þess að mikill landflótti muni bresta á og að erlendir aðilar munu eignast allar auðlindir þjóðarinnar. Spurningin er hvort maður eigi að setja hausinn undir sig og deyja með sæmd eða bara koma sér í burtu.

Það er hægt að klára málið á mjög skömmum tíma ef það er vilji til þess af hálfu Samfylkingarinnar,“

Stundum hrekkur út úr mönnum sannleikskorn í hita leiksins. Ekki að ég telji Þór Saari einhvern stórlygara, bara ekki eins vanur og reyndir þingmenn að segja ekki neitt þó þeir tali í tíma og ótíma. Eftirfarandi er haft eftir Þór á Mbl.is

 "Það er hægt að klára málið á mjög skömmum tíma ef það er vilji til þess af hálfu Samfylkingarinnar,“ 

Miðað við þetta er öll töf á IceSave málinu orsökuð af skoðunum Samfylkingarinnar á þeirri ríkisábyrgð sem Alþingi á að samþykkja. Þeir þingmenn sem vilja setja mjög trygga öryggisventla á ríkisábyrgðina eru ekki í Samfylkingunni, þeir eru í ýmsum öðrum flokkum.

Því virðist átaklínan snúast um hvort Samfylkingunni takist að koma ríkisábyrgðinni í gegnum þingið með eins veikum fyrirvörum og hugsast getur. Eina haldbæra skýringin á þessari afstöðu Samfylkingarinnar er þörf hennar að styggja ekki valdið í Brussel. Til að ná þessu markmiði sínu reynir Samfylkingin að hóta, setur þrönga tímaramma og lofar stjórnarslitum ef ekki verður gengið að kröfum hennar. Þeir hóta í Brussel og þeir hóta í Samfylkingunni, ekki furða að þau telji sig eiga betur heima í Brussel en Reykjavík.

Það er vaxandi skilningur meðal þjóðarinnar að ríkisábyrgðin er stórmál. Þetta snýst um sjálfstæði og sjálfsvirðingu þjóðarinnar. Það sem ekki allir gera sér grein fyrir að það eru mjög margir erlendis sem bíða í ofvæni eftir niðurstöðunni. Ef Íslendingum tekst að slíta af sér hlekkina þá er það fordæmi, fordæmi sem gæti gefið öðrum von. Við erum ekkert eyland ef einhver hélt það.

Hefðbundið pólitískt ofbeldi

Skáldskapur Alþjóðagjaldeyrissjóðsins by Eva Joly

Þessi orð Evu Joly sitja í mér.

"Þegar til kastanna kemur verður hvorki hægt að endurgreiða Alþjóðagjaldeyrissjóðnum né Bretlandi né Hollandi. Lega Íslands er hernaðarlega mikilvæg og landið ríkt af náttúruauðlindum. Ef svo fer sem horfir mun aldurssamsetning íbúanna breytast og ungt, menntað fólk flytja úr landi. Þeir sem eftir verða munu eiga meira undir þeim sem hæst býður."

Hún er sannfærð um að þetta verði niðurstaðan ef við samþykkjum IceSave. Í sömu grein gefur hún ekkert fyrir áætlanir stórlaxanna í heimsmálunum til betrunar. Hún kallar slíkt fagurgala.

Eftir sem ég velti þessu meira fyrir mér þá verður það stöðugt verra. Takið eftir að hún gerir ekki ráð fyrir því að við getum endurgreitt lán AGS. Ekki einu sinni þau lán. Þegar haft er í huga að þessi lán frá AGS eru eingöngu hugsað sem viðspyrna fyrir krónuna, sem gjaldeyrisforði. Þeir hjá AGS hafa reiknað út þörf okkar fyrir gjaldeyrisforða og komist að því að við þurfum tíu sinnum meira en við höfum notast við hingað til. Mjög merkilegt. Þetta risalán er eins og yfirdráttarheimild sem er ekki nýtt en samt greiddir vextir af. Ennþá merkilegra. Ég sem einstaklingur hef betri díl við bankann minn, ég borga ekki vexti af minni yfirdráttarheimild fyrr en ég nota hana.

Ef Eva hefur lög að mæla þá er þessi lánasúpa sem ekki er hægt að endurgreiða til þess að setja Ísland í þrot. Enda spyr Eva;

"Ætla Evrópa og AGS að koma Íslandi á vonarvöl?"

Verðum við ekki að taka orð hennar alvarlega og hugsa okkar gang betur?

 

 

Dabbi, Darwin og aðrir Sjálfstæðismenn.

Dabbi kóngur grínast á Landsfundi Sjálfstæðismanna og þeir klappa geðveikt mikið honum til heiðurs. Dabbi er að verja sig og telur sig vera stikkfrí. 20.000 manns eru atvinnulausir. Er það eitthvað til að grínast með, samt klappa allir Sjálfstæðismenn. Sjálfstæðismenn trúa á kenningar Darwins, þeir hæfustu munu lifa. Því klappa þeir, því þeir lifa og álykta að það sé vegna þess að þeir séu  hæfastir. Hinir eru óhæfir sem hafa orðið atvinnulausir. Darwin. Gallinn er bara sá að ef einhver er hæfari þá skaðast einhver annar, þ.e. sá atvinnulausi, þeir deyja nefnilega ekki út. Það skilja ekki Sjálfstæðismenn.

Borgarafundur í Háskólabíó í kvöld kl 20:00

Hvet alla til að mæta, Ríkisstjórnin kemur vonandi, þeim hefur verið boðið. Skuldastaðan og týndu milljarðarnir verða m.a. til umræðu.

"kannski ég hefði átt að gera það"

Þetta er Geir Haarde uppmálaður og öll stjórnkænska hans. Mikill skortur á framtakssemi. Sjálfsagt mun vera hægt að færa rök fyrir því að athafnaleysi hans hafi gert kreppuna á Íslandi verri. Að bregðast ekki við augljósri hættu eða neyð er refsivert athæfi. Við göngum bara ekki framhjá slysstað án þess að reyna að hjálpa. Síðan stjórnar þessi maður stjórnarandstöðu sem stundar málþóf og upphlaup sem tefur önnur mikilvæg störf á Alþingi. Verkstjóri í unglingavinnunni myndi sjálfsagt fórna höndum og óska þess að hann væri kominn einhvurt annað. Ég held að það ætti að setja þingmenn á uppmælingu eða akkorð svo hlutirnir komist í verk. Þeim er greinilega ekki treystandi á tímakaupi.