Læknaráð og Hafró.

Það er ein af tillögum ríkisstjórnarinnar að Hafró skipi sérfæðingahóp til að rannsaka sjálfan sig.

Núna hefur Mannréttindadómstóllinn í Evrópu nýlega dæmt í máli og snúið við dómi Hæstaréttar. Aðalgagnrýnin var sú að Læknaráð sem gaf umsögn til dómstólanna var samansett af mönnum sem störfuðu hjá Landspítalanum þar sem atvikið átti sér stað. Um greinilega hagsmunaárekstra, ég segi ekki hagsmunagæslu var að ræða. Þau gömlu lög sem Læknaráð byggir á eru allir sammála að fella úr gildi og þar á meðal læknar.

Þegar kemur að Hafró og rannsóknum þeirra þá eiga þeir að meta eigin ágæti. Niðurstaðan er nokkuð fyrirséð. Ég held að við getum hætt að tala um læknamafíu en frekar farið að velta fyrir okkur fiskifræðingamafíu. Hvað knýr menn til að berjast fyrir stefnu sem hefur fært okkur allt færri þorska áratugum saman. Hvernig ná menn slíkum árangri, erum við svona auðtrúa og gagnrýnislaus. Það eitt að enginn árangur hefur orðið ætti að vekja upp einhverjar efasemdir. 

Í gamla daga voru læknar í Guða tölu og enginn gagnrýndi ákvarðanir þeirra. Í dag þegar einstaklingur fær sjúkdóm fer hann á netið og spyr doksa hverja af þrem meðferðarmöguleikum hann hyggist velja fyrir sig. Þá segir doksi," nú ég vissi bara um tvo möguleika". Þetta er til mikilla bóta að einstaklingar eru meðvitaðir og taki fullan þátt í sinni meðferð. Þessu ber að fagna. 

Aftur á móti eru rannsóknir á þorskinum á einni hendi, þeir hafa algjört ægivald og eiga meira að segja leggja dóm á sjálfan sig, eins og Læknaráð. En nú fer fólk á netið og les sig til um rannsóknir á þorski og skyldum málum. Það kynnir sér málin og margir hafa tjáð sig og lýst miklum efasemdum um ágæti Hafró og tillagna þeirra. Einar K er sennilega ekki nettengdur eða auðtrúa. 

 

Athugasemdir

[Guðrún María Óskarsdóttir., 7.7.2007 kl. 00:23]

Sæll Gunnar.

Sú er þetta ritar hafði hátt í ræðu og riti á sínum tíma um þessi mál þe. Læknaráð og hið meinta hlutleysi þess til álitsgjafar í málum sem slíkum, svo mikið er víst. Að koma síðan að öðrum málaflokki í samfélaginu sjávarútvegi  þar sem ástandið er álíka og ekkert hefur þokast eða þróast það er skrítið.

kv.gmaria.

[Gunnar Skúli Ármannsson, 7.7.2007 kl. 21:58]

Þetta er mannlegt eðli. Þegar við eigum hagsmuna að gæta þá gerast hlutirnir á þennan hátt. Læknar í Læknaráði eða þeir í Hafró eru sjálfsagt besta fólk en mannlegt eðli hagar sér svona þannig að óvart hliðrast sannleikurinn í þá átt sem hentar hverju sinni.

Mér finnst það minni stétt til tekna að hún er að opnast og á auðveldara með að taka gagnrýni en áður, mjakast þó hægt fari.

Aftur á móti finnst mér talsmenn Hafró ekki hafa haft fyrir því að svara gagnrýni á sín störf. Er það miður.