Mjög nauðsynleg helgarlesning.

Lýsing Leo Tolstoy á skuldaánauð Fídjíbúa1:
Þýðing Egill Helgi Lárusson
Fidjíbúar búa í Pólinesíu, á eyjum í suður Kyrrahafi. Allur eyjaklasinn, útskýrir prófessor
Yánzhul, samanstendur af smáeyjum sem samtals eru um 20.720 ferkílómetrar. Einungis er
búið á helmingi þeirra og telur þjóðin 150.000 sálir auk 1.500 hvítingja. Frumbyggjarnir, sem
risu úr villimennsku fyrir margt löngu, eru þekktir fyrir dug sinn og eru þess megnugir að
vaxa og dafna eins og þeir hafa sýnt með því að verða fljótt góðir bændur og
húsdýraræktendur. Samfélag þeirra blómstraði en árið 1859 var konungdæmið komið í
örvæntingarfulla stöðu. Fídjíbúar og konungur þeirra, Thakombau, vantaði peninga. Þeir
þurftu 45.000 dollara sem Bandaríkin heimtuðu í skaðabætur fyrir ofbeldi sem sagt var að
Fídjíbúar hafi beitt bandaríska borgara.
Til þess að innheimta þessa upphæð höfðu Bandaríkjamenn sent herdeild á staðinn, sem í
skyndingu hertók nokkrar af bestu eyjunum sem tryggingu. Einnig hótuðu þeir að varpa
sprengjum á byggðir landsins nema skaðabæturnar væru greiddar í hendur fulltrúa
Bandaríkjanna fyrir tiltekna dagsetningu. Bandaríkjamenn höfðu verið meðal fyrstu hvítu
mannanna sem settust að á Fídjíeyjum sem trúboðar. Með einum eða öðrum hætti höfðu þeir
síðan sölsað undir sig besta ræktunarlandið og hófu ræktun á baðmull og kaffi. Þeir réðu hópa
frumbyggja í vinnu með samningum sem frumbyggjarnir skildu ekki eða fengu þá í gegnum
verktaka sem höndluðu með lifandi eignir. Átök milli frumbyggja og plantekrueigenda, sem
litu á þá sem þræla, voru óumflýjanleg. En slík átök urðu síðan ástæðan fyrir kröfu
Bandaríkjamanna. Á Fídjí tíðkaðist að greiðslur væru inntar af hendi með vörum líkt og
tíðkaðist í Evrópu fram á miðaldir. Frumbyggjarnir notuðu ekki peninga, viðskipti þeirra fóru
eingöngu fram með vöruskiptum; vörum var skipt fyrir vörur. Þau litlu opinberu gjöld sem
innheimt voru fengust af því sem landið gaf. Hvað áttu Fídjíbúar og Thakombau konungur að
gera þegar Bandaríkjamenn heimtuðu með þjósti 45.000 dollara í skjóli hótanna um að
afleiðingarnar yrðu alvarlegar ef ekki yrði greitt? Fyrir Fídjíbúa var engin leið að skilja slíka
upphæð, að ekki sé talað um peningana sem þeir höfðu aldrei séð í slíku magni. Thakombau
ráðfærði sig við aðra höfðingja og ákvað að snúa sér til Englandsdrottningar. Í fyrstu bað hann
hana að taka eyjarnar undir sinn verndarvæng og seinna bað hann hana einfaldlega um að
innlima þær. En Englendingar tóku þessari beiðni af varfærni og voru ekki á því að flýta sér
að hjálpa þessu hálfvillimannlega konungsdæmi í vandræðum þess. Í stað þess að svara með
beinum hætti sendu Englendingar af stað leiðangur til eyjanna árið 1860 til þess að meta hvort
það væri þess virði að eyða peningum í að losa landið undan hinum bandaríska lánardrottni og
innlima landið í breska heimsveldið.
Í millitíðinni héldu Bandaríkin kröfum sínum á lofti og í kjölfar þess að hafa hertekið bestu
eyjarnar sem tryggingu og þar með sér velmegun landsins var krafan hækkuð úr 45.000
dollurum í 90.000 dollara. Þessu fylgdi einnig hótun um að krafan yrði hækkuð enn meira ef
ekki yrði greitt á réttum tíma. Undir þessum þrýstingi ákvað Thakombau, sem ekki þekkti
evrópskar aðferðir til að útvega lán, og að áeggjan hvítra landnema, að leita til kaupmanna í
Melbourne um lán með hvaða skilmálum sem byðust, jafnvel þótt hann þyrfti að leggja allt
konungsríkið í hendur einkaaðila. Í kjölfar beiðni Thakombau var stofnað verslunarfélag í
Melbourne. Þetta félag, sem nefnt var Pólinesíufélagið, gerði samning við yfirvöld á Fídjí sem
var þeim mjög hagstæður. Með því að yfirtaka kröfu Bandaríkjanna og greiða hana á
tilteknum dagsetningum, fékk félagið samkvæmt samningnum að taka að eigin vali 40.000 og
síðar 80.000 hektara af besta landsvæðinu fyrir starfsemi sína. Að auki skyldi félagið vera
1 Úr bókinni "What then must we do?" skrifuð af Leo Tolstoy og fyrst gefin út árið 1886.
undanþegið öllum gjöldum og sköttum af verksmiðjum sínum, starfsemi og nýlendum og fá
langtíma einkaleyfi til bankareksturs með þeim forréttindum að gefa út ótakmarkað magn
peninga. Þegar samningurinn var loks undirritaður árið 1868 stóðu Fídjíbúar ásamt konungi
sínum andspænis öðru veldi, hinu áhrifamikla verslunarfélagi með víðfeðmar landareignir og
úrslitavald í málefnum ríkisstjórnarinnar. Til að fullnægja þörfum sínum hafði ríkisstjórn
Thakombau fram að þessu látið sér nægja það sem fékkst greitt með vörum sem landið gaf af
sér auk afraksturs lítilsháttar gjalds á innfluttar vörur. Með tilkomu samningsins og hins
volduga Pólinesíufélags versnaði fjárhagsstaða landsins. Mikilvægur hluti besta landsvæðisins
í ríkinu hafði flust yfir til félagsins þannig að skattheimta minnkaði. Í hinn endann, eins og við
vitum, hafði félagið einnig leyfi til inn- og útflutnings án þess að greiða gjöld sem leiddi
einnig til minnkandi tekna af tollgjöldum. Frumbyggjarnir, það er 99% íbúanna, höfðu alltaf
verið lélegir þátttakendur í tekjum sem fengust af innflutningi þar sem þeir notuðu mjög lítið
af evrópskum varningi fyrir utan lítilræði af baðmullarefnum og málmvöru. En með tilkomu
Pólinesíufélagsins losnuðu hinir efnameiru evrópsku íbúar undan tollgreiðslum og tekjur
Thakombau konungs urðu lítilfjörlegar. Hann þurfti með snatri að auka þær. Thakombau
ráðfærði sig við hvíta vini sína um það hvernig hann gæti leyst vandamál sitt. Honum var
ráðlagt að leggja, í fyrsta sinn í sögu landsins, beinan skatt á landsmenn og til að auðvelda
málin fyrir konung skyldi hann vera í formi peninga. Álögurnar voru settar á sem nefskattur
upp á eitt pund fyrir hvern karlmann og fjóra skildinga fyrir hverja konu á eyjunum.
Allt fram til þessa, eins og við nefndum fyrr, tíðkaðist jarðrækt og bein vöruskipti á
Fídjíeyjum. Mjög fáir frumbyggjar hafa pening milli handanna. Allur auður þeirra byggðist
eingöngu á ýmsum hrávörum og nautgripum, en ekki peningum. Samt sem áður krafðist hinn
nýi skattur, á tilteknum degi og án tafar, ákveðinnar upphæðar sem fyrir frumbyggja með
fjölskyldu varð að töluverðri upphæð. Fram til þessa átti frumbyggi ekki því að venjast að
borga persónulega greiðslu til ríkisins nema í formi vinnu. Allir skattar voru greiddir
sameiginlega af því þorpi sem hann tilheyrði, frá sameiginlegum ökrum sem einnig voru hans
aðaltekjulind. Hans eina leið út úr vandanum var að fá peningana frá hvítu nýlendubúunum,
það er, að fara annað hvort til verslunar- eða plantekrueiganda til að fá það sem honum
vantaði – peninga. Þeim fyrrnefnda þurfti hann að selja framleiðslu sína á hvaða verði sem
bauðst þar sem greiða þurfti skattinn á tilteknum degi. Önnur leið var að fá fyrirframgreiðslu á
framleiðsluna, en þessa aðstöðu nýttu kaupmenn sér til þess að auðgast óheiðarlega. Að
öðrum kosti gat frumbygginn boðið plantekrueiganda vinnu sína; gerst verkamaður. En í ljós
kom að laun á Fídjí voru mjög lág, líklegast vegna þess að margir íbúar buðu vinnu sína á
sama tíma. Samkvæmt skýrslu stjórnarinnar voru þau ekki hærri en sem nam einum skildingi
á viku fyrir fullorðinn karlmann eða sem svara 2 pundum og 12 skildingum á ári. Þetta þýðir
að til þess eins að borga sinn eigin skatt, að ekki sé minnst á skatt fjölskyldunnar, þyrfti
Fídjíbúi að yfirgefa heimili sitt, fjölskyldu, sitt eigið land og ræktun, og ferðast oft til annarar
eyjar og binda sig í vinnu hjá plantekrueiganda í hálft ár til þess að vinna sér inn eitt pund til
greiðslu skattsins. Til þess að greiða skattinn fyrir alla fjölskylduna þurfti að leita annara
leiða. Auðvelt er að ímynda sér afleiðingar alls þessa fyrirkomulags. Frá 150.000 þegnum
sínum safnaði Thakombau aðeins 6.000 pundum og fljótlega fór að bera á miklum og áður
óþekktum kröfum um heimtur á sköttum. Stjórnvöld sem áður höfðu þótt heiðarleg komust
fljótt að samkomulagi við hvítu plantekrueigendurna sem voru byrjaðir að stýra landinu.
Fídjíbúar voru dregnir fyrir dómstóla ef þeim tókst ekki að greiða skattinn og voru dæmdir,
auk greiðslu á kostnaði, til fangelsisvistar í lágmark hálft ár. Afplánunarstaðurinn kom í hlut
plantekru þess hvíta manns sem fyrstur bauðst til að greiða skatt og lögfræðikostnað fangans.
Með þessum hætti fengu hinir hvítu ódýrt vinnuafl svo lengi sem þá listi. Í fyrstu var þetta
framsal á nauðungarvinnu takmarkað við sex mánuði, en síðar komust spilltir dómarar að því
að hægt var að dæma menn í allt að 18 mánuði og síðan jafnvel endurnýja dóminn. Á fáeinum
árum breyttust aðstæður gjörsamlega. Stór svæði sem áður höfðu staðið í blóma urðu hálf
mannlaus og fátækt varð gríðarleg. Allir karlmenn, fyrir utan aldraða og veikburða, voru að
heiman að vinna á plantekrum hvítra annað hvort til að vinna sér inn pening fyrir
skattgreiðslum eða vinna af sér dóm. Kvenfólk á Fídjíeyjum vinnur varla nein
landbúnaðarstörf þannig að fjarvera karlmannanna þýddi að landið var vanrækt eða alveg
yfirgefið. Á fáum árum var hálf þjóðin orðin að þrælum hvítra nýlenduherra.
Þetta sorglega tímabil í sögu Fídjíbúa er skýrasta og besta dæmið um það hvað peningar eru
og áhrif þeirra. Hér er öllu lýst: fyrstu grunnþættir þrælahalds – fallbyssur, hótanir, morð,
landtakan og að auki aðaltækið – peningar, sem leysa af hólmi allar aðrar aðferðir. Það sem
hefur tekið aldir að gerast meðfram efnahagsþróun landa gerðist hér, þegar ýmis form
peningaþvinganna hafa verði fullþróuð, á aðeins tíu árum. Harmleikurinn hefst þegar
Bandaríkjamenn senda skip hlaðin vopnum að ströndum landsins hvers íbúa þeir vilja hneppa
í þrældóm. Yfirvarp hótannanna eru peningalegs eðlis, en harmleikurinn hefst þegar
fallbyssum er beint að öllum íbúum: konum, börnum og gamalmennum, nokkuð sem nú er
verið að endurtaka í Afríku, Kína og Mið-Asíu. Hvert var upphaf harmleiksins:"Peningana
eða lífið", sem sammerkt er öllum herleiðangrum allra þjóða. Fyrst 45.000 dollarar síðan
90.000 dollarar eða fjöldamorð. En það voru engir 90.000 dollara til. Bandaríkjamennirnir
áttu þá. Síðan hefst annar hluti harmleiksins: stuttu, blóðugu, hræðilegu og hnitmiðuðu
fjöldamorði verður að afstýra og skipta út fyrir minna áberandi, en langdregnari þjáningu.
Þjóðflokkurinn og höfðingi hans leita leiða til að skipta út fjöldamorðum fyrir peningalega
þrælkun. Lán er tekið og síðan er útfærslan á peningalegri þrælkun fólksins skipulögð.
Þessi útfærsla byrja strax að haga sér eins og agaður her og innan 5 ára er verkinu lokið.
Fólkið er ekki einungis svipt réttinum til landsins og eigna sinna, heldur einnig frelsinu. Það
er orðið að þrælum.
Þriðji hluti hefst: aðstæður eru orðnar of erfiðar og ógæfufólkið fer að heyra orðróm um að
það sé möguleiki á að skipta um drottnara og bindast þrælaböndum einhverjum öðrum. Að
losna undan þrældómi sem komið var á með peningum virðist ekki koma fólki til hugar
lengur. Og þjóðflokkurinn biðlar til nýs drottnara sem hann óskar eftir að mildi aðstæður þess.
Englendingarnir koma þegar þeir sjá að eyjarnar auðveldi þeim að brauðfæða sitt eigið fólk og
innlima eyjarnar ásamt íbúum þeirra. En þeir taka ekki við fólkinu sem þrælum né taka þeir
landið og dreifa því til eigin stuðningsmanna. Slíkar gamaldags aðferðir eru óþarfar núna. Það
eina sem þarf að gera er að krefjast nægjanlega stórrar verndargreiðslu til að halda þrælunum í
þrældómi annars vegar og hins vegar gefi nóg í aðra höndina.
Íbúarnir urðu að greiða 70.000 pund. Það var grundvallar skilyrðið fyrir því að England
samþykkti að bjarga Fídjíbúum frá amerískri þrælkun. Að sama skapi var þetta allt og sumt
sem þurfti til að fullklára þrældóm frumbyggjanna. En í ljósi þeirra aðstæðna sem Fídjíbúar
voru í var vonlaust fyrir þá að greiða 70.000 pund. Krafan var of há. Um tíma breyttu
Englendingar kröfunni og tóku við hluta af greiðslum í formi framleiðsluvara, en þegar
peningar komust aftur í umferð var kröfunni aftur breytt í fulla upphæð. England hagaði sér
ekki eins og verslunarfélagið hafði gert, sem líkja mátti við herför villimanna á hendur
villimannaþjóð sem vill einungis hirða allt sem hægt er áður en horfið er á braut. England
hagaði sér sem þrælahaldari með langtíma framtíðarsýn og drap ekki gullgæsina, fóðraði hana
jafnvel, vitandi það að hún verpti vel. Í fyrstu slökuðu þeir á taumnum, sér til framdráttar, til
þess eins seinna meir að taka í þá aftur og sökkva Fídjíbúum í sama peningaþrældóm og
Evrópa og hinn siðmenntaði heimur er í og engin sjáanleg leið er út úr.

Grætt á daginn og grillað...

Fólkið brást en ekki stefnan segir Sjálfstæðisflokkurinn. Í raun stórmerkileg niðurstaða, augljóslega miklir gáfumenn þar á bæ. Boðorðin tíu eru góð og gild stefna. Sú stefna hefur líka liðið fyrir breyska einstaklinga. Biblían hefur löngum varað við því að við skulum ekki aðra Guði hafa. Einnig að mammons dýrkun og dans í kringum gullkálfum kunni ekki góðri lukku að stýra. Þrátt fyrir þessi grunngildi í okkar þjóðfélagi hafa Sjálfstæðismenn predikað ást á gullkálfinum. Græða á daginn og grilla á kvöldin. Ef maður græðir hlýtur einhver annar að tapa, ekki satt. Ekkert verður til úr öngvu. Ef maður boðar að hamingjan sé fólgin í því að græða sem mest, er maður þá ekki að segja að maður lifi á óförum annarra. Tilvera manns sé greidd af öðrum, maður sé á framfæri einhvurs. Er þetta ekki dæmigerður Sjálfstæðisflokkur-pilsfaldakapitalismi.Spurningin er hvar fólkið brást?

Sturla í Frjálslynda flokkinn.

Ég var að sjá þetta núna. Ég er orðlaus. Ég er ekki alveg að meika það. Ég get þó huggað mig við það að það auðveldar mér valið í framtíðinni.

Sturla í Frjálslynda flokkinn

Hvað gerum við nú?

Fékk útreikning frá Lífeyrissjóðnum mínum í dag. Gerðum ráð fyrir 15% verðbólgu. Liðlega tuttugu milljónir eru orðnar rúmlega fjörutíu milljónir 2014, þ.e. eftir bara fimm ár. Miðað við þetta verð ég orðinn eignalaus maður árið 2014. Þessi fórn mín vegna bankahrunsins bætist ofaná allar skuldirnar sem við Íslendingar erum að taka á okkur. Ég á ekki að vera að kvarta, það eru margir í þessari stöðu í dag. Mitt dæmi bendir þó til þess að mjög margir verði komnir í algjör þrot eftir nokkur ár. Hækkun á bensíni og áfengi eykur enn á vandann, en það var samþykkt í gærkvöldi á Alþingi.

Verkalýðsforustan segir að það sé ekki sitt hlutverk að taka pólitíska afstöðu til málanna!! Það er eins og allir séu sammála um það að valta yfir þá sem minna mega sín í þjóðfélaginu. Það er eins og það sé stjórnvöldum ofviða að finna sanngirni í stöðunni. Þau geta ekki einu sinni sett á hátekjuskatt þeirra sem þó gefa upp réttar tekjur. Ég hefði verið sáttur við að lenda í slíkum skatti miðað við núverandi aðstæður í þjóðfélaginu.

Hvernig er staðan hjá okkur núna? Það eru ekki kosningar í vændum því stjórnarflokkarnir hafa ekki hug á því og meðan þeir sammælast um að halda stjórnmálasamstarfinu áfram, verða engar kosningar. Jafnvel þó að Sjálfstæðismenn gefi skít í Evrópusambandið mun Samfylkingin liggja utan í þeim því aðrir flokkar ætla ekki inn í EU. Verkalýðsforustan ætlar ekki að taka afstöðu, bara að jarma, því hún er sammála Samfylkingunni. Sjálfstæðisflokkurinn ætlar að láta þá sem minna mega sín borga kreppuna og Samfylkingin ætlar að ganga inn í EU. Niðurstaðan er sú sama. Við borgum alltaf að lokum, eða hvað? 

Spurningin er hvort maður eigi að skrá sig í VinstriGræna eða flytja bara til útlanda og gleyma því að maður hafi verið Íslendingur.

Stólafíklar og við-BURT MEÐ SPILLINGALIÐIÐ.

Hvernig á maður að haga sér núna. Á maður að ræða um eftirlaun ráðherra sem skipta engu máli í stóru myndinni. Á maður að velta sér upp úr því hvort Davíð Oddson hefði átt að ræða um eitthvað annað en sjálfan sig. Á maður að velta fyrir sér einhverjum öðrum smámálum. Nei, við eigum að einbeita okkur að aðalatriðunum, því sem skiptir máli.

Lýðræðið; það skiptir máli. Valdhafar hlusta ekki á þjóðina þessa dagana. Valdhafar hafa menn í fullri vinnu til að kasta ryki í augun á okkur borgurunum. Allt til að fegra sinn hlut. Hér er um mjög alvarlegan misskilning að ræða milli okkar og valdhafa. Þeir þurfa ekki að vera í neinni kosningabaráttu gegn okkur. Þeir eiga bara að vinna vinnuna sína og sína af sér heiðarleika og gott siðferði. Því áttu valdhafar að segja af sér strax í upphafi kreppunnar og skipa utanþingsstjórn. Að lafa í stólunum rúin öllu trausti er ekki nokkrum manni til gagns.

Réttlætið; Að endurráða spillingarliðið aftur inn í bankana og viðhalda óhæfum embættismönnum hjá eftirlitsstofnunum ríkisins er ekki bara heimskulegt heldur einnig spilling. Síðan þega ráðherrar hlægja góðlátlega að okkur, almúganum, og í þokkabót fara með rangt mál, þ.e. ljúga, eins og kom fram í fréttum ríkissjónvarpsins í kvöld, þá á okkur að vera nóg boðið. Enda er okkur nóg boðið, við viljum lýðræði, ekki alræði stólafíkla.

Framtíðin; hvernig bregðumst við við þessum erfiðu aðstæðum sem við erum í? Hver einstaklingur vill ekki verða gjaldþrota. Því er verðtrygging lána stórt mál. Hana þarf að afnema, núna. Ef einhverjar stofnanir eða lífeyrissjóðir fara illa út úr því getum við tekið á því seinna. Núna þarf að bjarga heimilunum.

Við þurfum að endurlífga Alþingi Íslendinga og virkni hins almenna borgara í þjóðmálum. 

Mætum á Austurvöll á morgun og í Háskólabíó á mánudagskvöldið. Verum ábyrg.

Opinn BORGARARAfundur á mánudagskvöld á NASA.

Kvennabolti.

Það hefur verið umræða um hversu mikið kvenna vs karlalandsliðið í fótbolta fái greitt. Merkileg umræða í sjálfu sér. Ef ég ræki þessi tvö lið og annað klúðraði öllu og hitt ynni alla leikina sína væri ég ekki lengi að gera upp hug minn hvoru ég myndi launa betur og  frekar. Þ.e.a.s. ef bæði liðin væru karlalið. En nú vill svo vel til að betra liðið er kvennalið og þær eru bara svo glaðar að vinna og finnst boltinn svo voðalega skemmtilegur að ég slepp við að borga þeim nokkuð sem heitið getur. Að sjálfsögðu nýti ég mér slíka aðstöðu, annars væri ég ekki bísnismaður. 

Þegar stúlkurnar fatta að þetta er bísnis en ekki bolti þá fara þær kannski að fá laun alls erfiðisins.