Vanveiddir þorskar.

Ég er enn að reyna að telja fiska. Var kominn það langt að ósennilegt væri að hortittir úr sjó tákni litla samkeppni um fæðu sökum ofveiði. Er hugsanlega um vanveiði að ræða, að allt sé morandi af þorski og þeir éti hvern annan út á gaddinn og stofninn hrynur svo í kjölfarið. Langtíma díet með öðrum orðum. Nú er ég kominn út á hálan ís finnst mér. Þeir hjá Hafró hafa aldrei talað um svona , þetta hlýtur að vera rangt hjá mér. Þetta er samt svolítið heillandi kenning, ekki satt, því lausnin væri að veiða meira. Klárlega ljúf tónlist fyrir þá sem vilja sækja sjóinn.

Þeir hjá Hafró hafa þó verið að merkja fiska og telja þá sem síðar veiðast. Heimturnar hafa verið slæmar á þessum VIP fiskum í net sjómanna. Ef við værum að veiða allan stofninn hlytu allir VIP fiskarnir að koma í netin. Hvert fóru þeir. Var þeim stolið, syntu þeir burt eða bara dóu þeir drottni sínum áður en okkur tókst að veiða þá. Kannski dóu þeir úr hungri eða voru bara étnir.

Það þýðir ekkert að benda á mig, ég veit ekki hvers vegna þorskar týnast í úthafinu, Hafró virðist ekki heldur hafa svarið á reiðum höndum. 

Matvandir þorskar hjá Hafró.

Hvernig skyldi maður telja fiska. Um það er deilt. Fyrir landkrabba sem sér bara fisk á disk geta rökræðurnar heldur betur snúist fyrir manni.

Við höfum verið þokkalega hlýðin Hafró, svona nokkurn veginn fiskað fjórðunginn af stofninum, þ.e.a.s ef ég skil þetta rétt. Ef svo er hljóta 75% að geta haldið stofninum við, a.m.k. ef um væri að ræða kanínur. En nú er þorskurinn ekki kanínur. Að fiskistofn sem ætíð minnkar í mælingum þrátt fyrir hóflega veiði, það hlýtur að vera eitthvað að, við erum að missa af einhverju. 

Gætu mælingarnar verið rangar, vorum við að veiða allt of stóran hluta af stofninum. Ættu þá ekki þorskarnir sem koma að landi núna að vera feitir og pattaralegir því þeir hafa nóg að éta því. mér skilst að þorskurinn sem við veiðum sé ekki feitur heldur grannur og vesældarlegur. Ætli þorskurinn sé orðinn svona matvandur hin síðari ár. Sennilega ekki, ég ætla að minnsta kosti ekki að veðja á að uppeldisfræði hafdjúpanna hafi breyst mikið. Ég held að enn gildi að eins dauði er annars brauð.

Þetta mjakast hjá mér, kannski mun ég skilja þetta einhvertímann, góð ráð vel þeginn.