Gjáin.

Ég er ekki alveg að kyngja þessu. Í den var munur á hægri og vinstri. Í dag virðast allir verða að einhverskonar skíthælum þegar komið er inn í steinhúsið við Austurvöll. Í dag var mótmælafundur á Austurvelli. Enn er gjá á milli stjórnvalda og almennings. Það virðist ekki skipta máli hver er í Ríkisstjórn. Það er eins og eina lausn íslenskra Ríkisstjórna sé að láta heimilunum blæða, að heimilin borgi kreppuna.

Hvað veldur þessu? Hvað veldur því að það skiptir engu máli hver situr í Ríkisstjórn. Hver segir ríkisstjórninni fyrir verkum? Ríkisstjórnin sinnir fjármagnseigendum af alúð og kristilegum kærleika. Hjörtu þeirra slá í takt. Skuldarar mega þvælast um ranghala stjórnsýslunnar og fjármálafyrirtækja einir á báti. Það finnst Ríkisstjórnum Íslands eðlilegt ástand. 

Þar með er komin gjá á milli þeirra sem skulda og þeirra sem lána. Sökum íslenskra laga eru lánveitendur þeir sem meira mega sín. Vinstri menn í Ríkisstjórn eru svo andskoti löghlýðnir að þeir geta ekki tekið málstað lítilmagnans. Öðruvísi mér áður brá. Ef svokallaðir vinstri menn ætla að fylgja gömlum lögum íhaldsins út í ystu æsar verður aldrei nein bylting. Bylting snýst um að kollvarpa gömlum gildum. Stólást Jóhönnu og Steingríms virðist ætla að koma í veg fyrir allar breytingar til hagsbóta fyrir skuldsett heimili landsmanna. Huggun harmi gegn er að sennilega verður mikið af ónotuðum evrum og hvölum á Íslandi eftir nokkur ár en sárafáir Íslendingar.

Gjáin breikkar, því miður. Sérkennilegt að þurfa kjósa mörgum sinnum á ári þó vandamálin séu augljós öllum. Lausnirnar að sama skapi. Hver stjórnar liðinu í steinhúsinu við Austurvöll?

Athugasemdir

[Lára Hanna Einarsdóttir, 24.5.2009 kl. 00:49]

Ég ætlaði að segja: "Helvíti er þetta góður pistill!" en sá mig um hönd og ákvað að sleppa blótsyrðum.

Eigum við að sættast á "ferlega, svakalega, gríðarlega..."?

[Steingrímur Helgason, 24.5.2009 kl. 01:08]

Dézkoti fín greiníng í grein...

[Rakel Sigurgeirsdóttir, 24.5.2009 kl. 01:24]

Upps, Lára Hanna er þegar búin að grípa orðin sem mér lágu á tungu til að lýsa hrifningu minni á þessum skrifum þínum. Líklegasta skýringin á því er sú að það þetta er skratti góður pistill!! Takk fyrir mig!

[Jóna Kolbrún Garðarsdóttir, 24.5.2009 kl. 01:35]

Heyr, heyr. 

[Gunnar Skúli Ármannsson, 24.5.2009 kl. 01:42]

Takk fyrir innlitin og alltaf gaman að geta glatt meðborgara sína.

[Rakel Sigurgeirsdóttir, 24.5.2009 kl. 01:46]

Fyrir mig virkaði þessi pistill eins og orkumixtúra. Ég gladdist reyndar líka yfir því að sjá að þú ert enn haldinn sama eldmóðinum! Það munar nefnilega um þig og þín steinefnaríku skrif

[AK-72, 24.5.2009 kl. 01:47]

Góður pistill.

[Gunnar Skúli Ármannsson, 24.5.2009 kl. 02:03]

Var að koma frá Norðfirði eftir 2 vikna vinnu, var alinn á saltfiski og hamsa. Komst lítið á netið. Hafði því meiri tíma til að hugsa.