Landspítalinn okkar-er hann ómissandi?

Rætt er um mikinn niðurskurð á Landspítalanum okkar. Það er þungur róður að flysja meira af honum sökum þess að hann er vel tálgaður fyrir eftir sparnað árum saman. Til viðbótar hafa öll aðföng hækkað verulega sökum veikingu krónunnar. Því er okkur mikill vandi á höndum. Ef við skerum niður um 10% af ekki raunhæfum fjárlögum, aðkeyptar vörur hækka um 40-50% og eigum að veita nákvæmlega sömu þjónustu erum við komin með jöfnu sem gengur ekki upp.

Sumir álíta að það sé létt verk að spara á Landspítalanum. Skoðun þeirra byggist á því að mikil ofmönnun sé þar og bruðl. Sumir halda jafnvel að á Landspítalanum séu framkvæmdir hlutir sem séu betur ógerðir-óþarfir eða jafnvel séu betur gerðir af öðrum. Sumir óska þess svo innilega að hægt sé að spara á Landspítalanum svo einhverstaðar sé hægt að spara.

Rekstur Landspítalans kostar meira en 30 milljarða á ári. Mörgum finnst það óskiljanlegt að ekki sé hægt að klípa aðeins af þessari upphæð. Ég tel að ekki sé hægt að spara nema að skerða þjónustu Landspítalans. Þá vandast málið.

Hver á að ákveða hvar eigi að skera niður. Eru það starfsmenn, alþingismenn eða þjóðin?

Hvað eigum við að láta ógert og hvað ekki?

Svör óskast! 

Athugasemdir

[doddý, 15.4.2009 kl. 23:11]

heyrðu gunnar kæri vinur, ég hélt að þessi pistill kæmi aldrei. við sem þarna vinnum vitum næstum allt um það hvar ekki er hægt að spara í rekstrinum. fyrir hina sem minna þekkja reksturinn en þurfa á honum að halda, verð ég að koma á framfæri því sem starfsfólk hefur heyrt - og það er að fórnarkostnaður verður óumflýjanlegur og kemur niður á veiku, slösuðu og deyjandi fólki. þetta er ekkert leyndarmál en enginn segir það upphátt. það er gert ráð fyrir því að sparnaður komi beint niður á sjúklingum og gert er ráð fyrir því að biðlistar lengist. verst fyrir þá sem þurfa aðstoð... kv d

[Gunnar Skúli Ármannsson, 15.4.2009 kl. 23:35]

Sæl Doddy, sammála þér. Niðurskurðurinn mun bitna illa á þeim sem veikastir eru fyrir. Jafnvel er mögulegt að eingöngu verði gerðar bráða og hálfbráðaaðgerðir ef þessi niðurskurður nær fram að ganga. Vandamálin munu ekki hverfa á þann hátt, eingöngu safnast upp. Eina von sparnaðarsinna er að fólk týni tölunni á biðlistunum og minnki þannig kostnað heilbrigðiskerfisins.

[Jóna Kolbrún Garðarsdóttir, 16.4.2009 kl. 00:43]

Allur niðurskurður í heilbrigðiskerfinu á að vera síðasta úrræði. 

[Ásgeir Rúnar Helgason, 16.4.2009 kl. 19:30]

Alsæll félagi.

Þetta með hvar á að spara og hverjum á að lóga er ekkert einfalt mál. Hinsvegar þarf ekki alltaf að skera niður eða minka þjónustu til að spara.

Við náðum t.a.m. að auka kostnaðarhagkvæmni reykleysismeðferðar í Svíþjóð verulega með því að þróa meðferðarúrræði gegnum síma sem rannsóknir sýndu að gaf jafn góðan árangur og mun dýrari meðferð á klíníkinni. Við höfum nú náð að auka meðferðarárangurinn í símameðferðinni verulega og erum nú að skoða hvort við getur haldið sama meðferðarárangri áfram með 25% minni kostnaði. Nú erum við að skoða hvort hægt sé að nota svipaðar aðferðir við meðferð á ofneyslu áfengis og fyrstu niðurstöður lofa bara góðu a.m.k. fyrir vissan hóp fólks.

Þetta er nú bara eitt lítið dæmi um það hvernig hægt er að gera rekstur í heilbrigðiskerfinu bæði betri og ódýrari með markvissu árangursmati og rannsóknum.

Eins og þú sér á blogginu mínu þá hef ég lokað fyrir athugasemdir þar vegna þess að það tók alltof mikinn tíma að svara athugasemdum EN ég gef upp e-mailið mitt á blogginu í staðinn fyrir þá sem vilja hafa samband! Gangi ykkur vel í baráttunni. Sjálfur er ég VGari í þessum kosningum eins og þú kannski hefur giskað á miðað við forsögu málsins:)

[doddý, 16.4.2009 kl. 20:41]

sæll gunnar skúli. mér er hálfbrugðið. ég átti von á mun sterkari viðbrögðum við þessum pistli hjá þér. það er eins og fólk geri sér enga grein fyrir því að sjúklingar eiga eftir að deyja vegna sparnaðar. sjálf get ég ekki bent á neina leið sem bjargar þeim sjúklingum, því miður. ég vona bara að það verði ekki ég eða neinn úr minni fjölskyldu. kv d