Tannlæknasvæfingar.

Í Blaðinu í dag er grein um svæfingar vegna tannviðgerða á börnum. Réttara sagt skort á svæfingum. Bent er á að þessi þjónusta fáist í þjóðfélögum sem við berum okkur gjarnan saman við. Sagt er að svæfingalæknar hafi lítinn áhuga á þessum svæfingum vegna þess að þær séu ver borgaðar af Tryggingastofnun miðað við aðrar svæfingar. Sjálfsagt rétt en ekki meginskýringin.

Þessar svæfingar hafa verið stundaðar á stofum tannlækna. Þar hefur ekki verið nein sérstök aðstaða fyrir svæfingar. Svæfingalæknirinn hefur komið með sín tæki og tól í lítill tösku og sett upp svona "mini" svæfingaraðstöðu. Einstaka hafa alltaf svæft fyrir sama tannlækninn árum saman og geta útbúið eitthvað betri aðstöðu fyrir sig.

Að svæfa fólk er ekki hættulaust. Að svæfa börn er vandasamara. Að svæfa börn þar sem unnið er í öndunarveginum er enn vandasamara. Að gera við tennur er oftast ekki hættulegt. Því á vinnuaðstaðan að miðast við þann þátt starfseminnar sem er hættulegastur fyrir sjúklinginn.

Að stunda farandsvæfingar vegna tannviðgerða er steinöld, það er ekki sæmandi nú til dags. Engum skjólstæðingum svæfingalækna í dag er boðið upp á slíkar hörmungaraðstæður nema börnum sem þurfa tannviðgerð. Allir aðrir eru svæfðir við mun betri aðstæður.

Ég held að það sé meginskýringin á því að erfitt sé að fá svæfingalækna til að sinna þessu.

Tannlæknar ættu að koma sér upp einni stofu þar sem allar svæfingar fara fram vegna tannviðgerða. Þar sé vandað til allra hluta, góð vinnuaðstaða, nægur mannafli til að sinna barnasvæfingum og hámarks öryggi tryggt eins og kostur er. Annað er ekki bjóðandi börnunum okkar í dag. 

 

Athugasemdir

[Guðrún María Óskarsdóttir., 15.8.2007 kl. 02:32]

Sammála, sammála , sammála.

kv.gmaria.

[Ásthildur Cesil Þórðardóttir, 15.8.2007 kl. 10:04]

Búin að ala upp 4 börn og fylgjast með því fimmta frá fæðingu hef aldrei heyrt talað um svæfingar í sambandi við tannlækningar.  Að vísu eru öll börnin mín með afskaplega góðar og heilbrigðar tennur sem betur fer, nema stubburinn minn en vegna hmmm ráðslags móður hans á meðgöngu, þá eru tennur hans frekar viðkvæmar.  En hann er harður af sér sá stutti og lætur ekki einu sinni deyfa sig.

[Ásgeir Rúnar Helgason, 15.8.2007 kl. 21:09]

Góð hugmynd!

Gulli betri:

[Gunnar Skúli Ármannsson, 15.8.2007 kl. 23:50]

Sæl öll sömul. Það kemur reyndar fram í Blaðinu í dag að unnið er að úrbótum í þessu máli.

Ásthildur, ég hef sjálfur mjög sjaldan látið deyfa mig hjá tannlækni. Þegar enginn möguleiki var á svæfingum fyrir tannviðgerðir þá lét fólk sig hafa það. Aftur á móti hefur margt breyst. Í dag er það talið rangt að finna til. Við getum svo sem haft okkar skoðun á því en svona er það.